The content originally appeared on:
Diario
Corte Comun ta aclarea cu Alco-Sensor IV ta aceptabel
ORANJESTAD (AAN): Corte den Prome Instancia di Aruba a tuma nota di e noticia den prensa unda ta ser bisa cu un huez di e Corte aki lo a bisa ultimo den un caso penal di Ministerio Publico contra un marinier cu e aparato di analisa rosea di Cuerpo Policial di Aruba lo no ta sirbi.
Segun Corte, e huez concerni no a bisa esey den su sentencia pa libera e militar for di e caso recien di accident fatal den Havenstraat na Aruba.
En corto e ta bisa cu mester aplica e ley penal di Hulanda ora un marinier comete un delito pafo di Hulanda. E investigacion di e caso conserni no a tuma lugar conforme e ley penal di Hulanda. Koninklijke Marechausse (KMAR) mester a haci e investigacion encuanto coremento bou influencia di alcohol y e aparato di analisa rosea na KMAR mester a worde uza.
Mester aplica e ley penal di Aruba ora personanan cu no ta militar comete un delito na Aruba y e aparato di analisa rosea di Cuerpo Policial di Aruba por worde uza ora un persona ta worde sospecha di a core bou influencia di alcohol.
E aclareacion aki ta nifica cu pues keto bay, e sistema di Alco Sensor IV di Cuerpo Policial di Aruba ta aceptabel pa ley y pa Corte. Pero djis un militar tin di bay usa e aparatonan cu Marechaussee tin na nan disposicion.
