The content originally appeared on:
Diario
Dia di idioma materno ta exigi bolbe na e lucha di Jossy Mansur
Existencia di DIARIO mara na dignidad di identidad propio di e Arubiano
Deber Parlamento enfrente idioma ta igual na defensa di balor material
ORANJESTAD(AAN)—Durante e siman aki, dia 21 di Februari e Dia Mundial di Idioma Materno a wordo celebra.
Un dia sumamente importante pasobra e ta haci un Pueblo bolbe na e realidad cu e ta forma un union, un grupo di hende cu conhuntamente ta lucha pa su bienestar como ser humano.
Pa hende por uni mester di cierto elementonan, cu ta wordo identifica cu e palabra “cultura”, cu den transcurso di tempo a bira e motibo cu hende a lucha pa e derecho di ta doño di e destino di e union, e pais, di cual nan ta forma parti.
Ora papia di Status Aparte di Aruba, directamente mester papia di e idioma di Aruba, cu ta uno di e factornan importante pa splica diferencianan grandi den e realidadnan cu a forma cultura na cada uno di e otro paisnan cu a forma parti di Reino Hulandes.
Ora Aruba a lucha pa su Status Aparte, e lucha pa aceptacion oficial di Papiamento como idioma materno di Aruba, mester wordo mira como parti integral di Status Aparte y mester wordo respeta.
Nacemento di DIARIO tabata basa riba e lucha di Status Aparte di Aruba.
Fundador di DIARIO, tabata Jossy Mehsen Mansur, cu a forma parti di e team di Arubianonan cu a bringa pa mantencion di loke por considera alma di historia di Aruba.
E idioma Papiamento tabata un vehiculo directo pa Arubianonan comunica cu otro pero tambe un identificacion directo di un Arubiano, cu ta dustingui su mes cu su Papiamento verbal y escrito.
Respet pa e Arubiano, mester a bini dilanti den respet pa idioma di e Pueblo, cu francamente awe ta wordo maltrata publicamente.
Mientras Aruba ta celebra Dia di Idioma Materno, mas y mas por tuma nota con palabranan cu ta forma parti di e vocabulario autentico di Aruba, ta wordo reemplasa cu palabranan di Papiamentu of palabranan cu hasta no ta existi.
E defensa di Papiamento no ta presente mas den Parlamento di Aruba, cu ta existi pa motibo di e lucha di e Arubiano pa por mantene su propio caracter y identidad riba tur tereno.
DIARIO ta keda fiel na e lucha di e Arubiano, Jossy Mansur, pa asegura defensa di e idioma, cu ta parti di identidad di cada miembro di e Pueblo di Aruba.
Erornan ta wordo comete den textonan di Papiamento, hasta contra boluntad di hende, cu no ta capaz di continuamente evita un eror tipografico.
Spellcheck ta e instrumento cu ta permiti automaticamente skirbi idioma na e forma corecto, pero spellcheck no ta existi pa Papiamento.
Con importante idioma ta pa un pais, ta bini dilanti sigur riba e tereno di spellcheck cu ora por ehempel ta coregi un documento skirbi na Ingles segun sistema Mericano, ta tene na consideracion, e diferencia entre e Ingles na Inglatera y e Ingles na Merca.
Nos no ta papia mes di Spaño, cu ta respeta e adaptacion di Pueblonan na diferente pais na un forma cu mesterta ehempel.
Aruba ta pasa den un tempo sumamente importante den cual e vehiculo cu a keda entrega na Aruba den pasado, Status Aparte, pa e pais por lucha pa su dignidad riba tur tereno, cu ta Papiamento, mester haya e atencion cu e merece.
E idioma di e Pueblo di Aruba, no por wordo interpreta segun deseo di cada persona.
Papiamento tabata base di e derecho di existencia di DIARIO, cu a nace como lucha di Jossy Mehsen Mansur pa identidad di su Pueblo y herment di Status Aparte.
E momento a yega, pa e lucha di Status Aparte, haya e reconocemento real como tal, cu introduccion di exigencia pa respet pa e Papiamento original di e Arubiano, cu su vocabulario y su reglanan y no segun concepto di cada persona.
Aruba merece respet pa loke el a logra como Pueblo y respet pa identidad di un persona ta cuminsa cu respet pa su origen, su nacionalidad, su idioma cu mester ricibi defensa maximo!
Awe deber di Parlamento ta bay mas leo cu defensa material pero ta exigi defensa di loke no ta material, cu sigur ta e idioma di e Arubiano, Papiamento, segun regla y vocabulario.
