‘Relevo ta responsabilidad entrega na un siguiente generacion’

Mike Eman:

• Wendrick Cicilia a tuma liderato di Partido AVP 

ORANJESTAD (AAN): Den un discurso carga cu historia, recuerdo y emocion, Mike Eman a despedi Diadomingo  como lider di Partido AVP, poniendo su propio trayectoria den un historia cu, manera el a enfatisa, no a cuminsa cu su 25 aña di liderazgo.

El a bay bek na e raisnan di un pensamento di servicio na pueblo, recordando su welo Cornelis Hendrik “Cornes” Eman, despues e generacionnan cu a sigui y e lucha di AVP pa un Aruba caminda progreso y oportunidad mester beneficia pueblo. Un hilo cu, segun Eman, a pasa di generacion pa generacion y cu tin Bon Comun, husticia y servicio na prohimo como su fundeshi.

   Eman a recorda tambe Henny Eman, su liderazgo y e mensahe di speranza di Un Aruba Nobo. Cu emocion, el a reconoce e rol di su propio famia, particularmente su mama, kende a acompaña diferente generacion durante nan trayectoria politico.

   Mirando bek riba su propio periodo como lider, Eman a expresa profundo gratitud pa e confianza y cariño cu el a ricibi di pueblo durante añanan. El a recorda momentonan dificil, eleccionnan, lucha y causa social cu a marca su trayectoria, incluyendo e compromiso pa un pensioen mas husto pa adultonan mayor.

  Miras padilanti: Pero su despedida a mira principalmente dilanti. Eman a expresa cu e ta profundamente contento cu e por haci un transicion organiza, mientras e ainda tin salud, energia, idea y compromiso pa sigui sirbi. P’e, relevo no mester nifica cu experiencia ta desaparece, sino cu responsabilidad por pasa conscientemente na un siguiente generacion.

   Cu esey, el a expresa su confianza den Wendrick Cicilia, na kende e ta traspasa liderazgo di Partido AVP.  “Mi ta sinti den su curason, mi ta sinti den su conciencia, mi ta sinti den su compromiso, cu e ta sinti tambe e mesun yamada aki.”

   Awe, despues di 25 aña na cabes di AVP, Mike Eman ta entrega liderazgo den e mesun spiritu cu el a describi durante su discurso: cada generacion ta ricibi un responsabilidad, carga esaki durante su turno y despues entrega esaki na esnan cu ta bin.  Un capitulo ta cera. Era di Relevo ta sigui.