Temblor basta fuerte sinti den casi tur bario na Aruba

Diabierna mainta trempan

• Magnitud di 3.8º apenas 14 km zuid di San Nicolas 

ORANJESTAD (AAN): Diabierna mainta un temblor basta fuerte a sacudi Aruba, y hopi hende mes a sinti esaki.  Aunke tin algun persona cu no a ni ripara cu esaki ta socede.

   El a socede pa exactamente 6:19 am, y e tabatin un magnitud basta intenso, esta di 3.8º riba Scala di Richter.

   E epicentro a wordo localiza na 12.26º Nort y 69.92º West.  Esaki ta apenas 14 km zuid di Baby Beach na San Nicolas (Aruba).  E ta igual cu 17 km zuid for di Pier di Mariniers Kazerne Savaneta (Aruba).  E ta igual cu 25 km zuid di Rotonde di Santa Cruz (Aruba).  E ta igual cu 28 km Zuid-Zuidoost di Wilhelmina Park na Oranjestad (Aruba).  E ta igual cu 12 km Noordoost di Cabo San Roman na estado Falcon (Venezuela).

   E epicentro tabata na un profundidad di 34,9 km bao subsuelo di lama.

   E intensidad di 3.8º ta uno basta fuerte, y pa tal motibo ta hopi bario na Aruba a sinti esaki.  Algun hende a hasta spierta debi na e temblamento, y hopi hende na San Nicolas a confirma cu nan a sinti esaki fuerte.  Algun a raporta cu nan dak di zink a produci sonido masha mahos mes, algun a bisa cu esey a socede pa mas di 20 seconde.

   For di e seismogram, por mira cu e temblor a start pa como 6:19:30 am, y a sacudi fuerte pa casi 30 seconde, sigui pa como 15 seconde mas di sacudimento mas leve.  Pero hopi hende na Aruba a djis sinti como 20 te 30 seconde.  Varios ciudadano a raporta cu nan a sinti comosifuera un truck pisa ta pasando, y pesey e sonido di ‘tembla’ tabata wordo sinti.

   Tin basta hende tambe na Santa Cruz cu a sinti esaki, y otro barionan cu tambe a raporta ta Papilon, Pos Chiquito, Savaneta, Mon Pos, Kiviti, Alto Vista, Meiveld, Calbas, De Vuyst, San Fuego, Weg Rooi Hundo, Sero Pita, Sero Lopez, Tamarijn, Sabana Liber, Boroncana, Tanki Flip, Paradera, Weg Sero Blanco, Hooiberg, Tanki Leendert, Jaburibari.

   Un ciudadano di Mangel Halto a bisa cu un scheur nobo a aparece den e pleister pafo di su garage, y el a priminti di manda un potret pa DIARIO, pero te na cierre di edicion no a ricibi esaki.

   Un señora di bario Washington a bisa cu e tabata drumi y no a sinti nada, siendo cu su Alarm di smartphone ta poni pa bati pa 6:20 am pa prepara su yiu pa scol.   Pues el a sacudi pa 6:19 am y no a sinti nada, y ora cu su alarma a lante pa 6:20 am, no tabata sa mes.

   Otro temblor pa 12:56 pm:  Mas di 6 ora despues, un temblor fuerte di 4.9º riba Scala di Richter.  Esaki a socede den lama, na como 355 km panort di Faro di California (Aruba).  E ta apenas 285 km pazuid di Santo Domingo (Republica Dominicana).  Esun aki a wordo localiza na 15.85º Nort y 70.29º West.