Ta recomenda pa ta cauteloso ora di contrata cuidador na cas

Directora di Directie Ouderenzaken, Desiree Helder

ORANJESTAD (AAN): Directora di Directie Ouderenzaken, Desiree Helder, ta expresa preocupacion tocante e cantidad creciente di persona cu ta ofrece servicio di cuido pa nos grandinan na cas, sin cu semper tin claridad tocante nan preparacion, experiencia of diploma.

   Segun Helder, cada biaha mas persona ta anuncia servicio di cuido mediante Facebook, entre otro riba pagina manera Vraag en Aanbod. Sinembargo, hopi biaha e persona cu mester di cuido of su famia no ta puntra pa diploma, referencia ni experiencia anterior.

   “Esaki por trece peliger den cas, pasobra bo no sa ken bo ta trece den bo cas, ni kico e persona sa of no sa,” Helder a bisa.

  E riesgo ta ainda mas grandi ora ta trata di un adulto mayor of paciente cu mester di cuido compleho, por ehempel un persona cu presion halto, diabetes of un herida. Den caso asina, ta importante pa e cuidador tin e conocemento y preparacion necesario pa atende e persona corectamente.

  Directie Ouderenzaken ta recomenda publico pa den caso di e necesidad aki, acudi na un instancia grandi y profesional, manera Wit Gele Kruis of otro organizacion cu tin profesionalnan den servicio. Si un cuidador bisa cu e ta representa of traha pa cierto instancia, famianan mester verifica esaki directamente cu e organizacion menciona.

  Helder ta adverti cu falta di control por aumenta e riesgo di mal cuido, abuso of ladronicia den cas. P’esey, prome cu contrata un persona, famianan mester haci un investigacion basico tocante su identidad y trayectoria.

  “Mester puntra si e persona tin diploma, unda el a studia, ki nivel e tin y si e tin experiencia cu e tipo di cuido cu ta necesario. Puntra pa referencia y yama e persona of compania pa verifica e informacion,” Helder a conseha.

  Si e candidato bisa cu el a traha anteriormente pa un compania, ta importante pa yama e compania y confirma si esaki ta berdad, cuanto tempo el a traha ey y si e tin e experiencia necesario.

  Directie Ouderenzaken ta enfatisa cu prijs no mester ta e unico criterio pa scoge un cuidador. Un oferta mas barata por parce atractivo, pero esaki no ta sustitui preparacion, confiabilidad y experiencia.

   “Prome cu bo laga un persona drenta bo cas pa cuida abo of un ser keri, verifica su informacion. Tuma e tempo pa controla. Cuido por ta di gran ayudo, pero un mal cuidador por trece peliger den cas,” Helder a conclui.