Autoridadnan a canta bingo durante un razzia na San Fuego

A produci hopi droga tipo MDMA y Tusi...

• Tres persona a keda deteni 

ORANJESTAD (AAN): E investigacionnan cu autoridadnan hudicial na Aruba ta haciendo, ta bayendo den bon direccion.  Nan ta busca tur forma pa reduci e bendito droga cu ta cabando cu futuro generacion.

   A base di tip, y tambe investigacion y vigilancia, finalmente autoridadnan hudicial di Unit Narcotica di Cuerpo Policial a ricibi suficiente indicacion di un “operacion bon scondi” andando den bario di San Fuego den distrito di Santa Cruz.

   Di e forma ey, nan a acerca Ministerio Publico cu tur detaye, y asina finalmente Fiscal a duna luz berde pa tene un razzia di sorpresa na e adres.

   DIARIO a haya sa, cu Unit Narcotica tabata investigando e caso serio tocante un cargamento di droga di tipo marihuana cu a drenta nos isla ilicito.

   Investigacion relampago dirigi pa Unit Narcotica a logra detene tres persona relacion cu e caso andando aki.

   Pa e accion menciona a forma parti Unidad canino (K9) y RRT di Polis pa ehecuta un entrada hudicial na un cas na San Fuego na Santa Cruz.

   E investigacion a duna un resultado exitoso despues di un redada, cu a haya un cargamento grandi di substancia ilicito entre otro; MDMA y e droga conoci como” Tusi” di cual tur a wordo confisca.

E sospechosonan  ta hende homber cu  inicialnan; D.A.C.O.di 38 aña di edad naci na Venezuela, e sospechoso A.D.M. di 41 aña di edad naci na Aruba y e sospechoso M.P.M. di 30 aña di edad naci na Colombia.

   E caso ta den pleno desaroyo y e investigacion ta andando. No ta descarta cu mas detencion por cay den e proximo dianan.

Cuerpo Policial Aruba ta urgi esnan cu sa algo of a wak algo pa yama tiplijn di Polis cu ta 11141. Bo ta keda anonimo.