The content originally appeared on:
Diario
ORANJESTAD(AAN): E aña aki ta bay ta di 18 aña cu Aruba Bank ta organiza su Aruba Bank Walk & Run, hunto cu su partnernan IBiSA y Subway.
“E Aruba Bank Walk & Run ta e ‘vierdaagse’ mas grandi riba nos isla”.
Esaki ta un evento pa henter pueblo di Aruba, caminda cu nos ta enfoca riba movecion y salud, segun Edseline Leer di Aruba Bank.
El a sigui bisa cu den e evento ta bay tin 2500 participante riba caminda pa 4 dia largo den 4 diferente distrito.
Segun Leer e evento aki nunca ta falta ambiente.
E evento ta bay tuma lugar di 20 di te cu 23 di Mei.
Tai-Foo Lee di Subway tambe a hiba palabra y a trece dilanti cu ta un orguyo pa un biaha mas participa na e evento di Aruba Bank cu ta e evento mas grandi.
Un ruta nobo e aña aki ta via Santa Cruz y Lee a indica cu Subway di Santa Cruz ta bay ta habri bek pa dia cu e evento tuma lugar.
Will Erasmus di IBiSA durante e conferencia di prensa a indica cu e ta contento di forma parti di e evento aki un biaha mas, mirando cu e Aruba Bank Walk & Run ta cuadra cu e metanan tambe di IBiSA, cu ta promove movecion y salud na Aruba completo.
“Manera tur aña nos ta yuda den e parti di logistica y organizacion y nos ta bezig tambe durante e actividad ta yuda tur caminda, incluyendo e parti di registracion y seguridad”, segun Erasmus.
Roxanne Croes di Aruba Bank a hiba palabra tambe y el a trece dilanti cu e aña aki e evento ta cuminza den e distrito di Paradera.
El a splica cu registracion pa e Walk & Rub ta cuminza dia 2 di Mei exactamente 6’or di atardi pa e 2500 participantenan.
