The content originally appeared on:
Diario
Prome Minister felicitando Aruba
ORANJESTAD (AAN): Durante e conferencia di prensa di Gobierno di Aruba diamars 13 di februari, Prome Minister Evelyn Wever-Croes a felicita Aruba henter cu e celebracion di Carnaval 70. “Mi ta gradici tur persona cu di un of otro manera a yuda y traha duro pa engrandece nos Carnaval 70”, Prome Minister a expresa.
Aruba por mira atras riba un carnaval bunita y pueblo di Aruba por ta orguyoso di dj’e. Cu 4235 participante y mas di 800 boluntario, a percura pa un espectaculo di marca mayor. Aruba a duna un tributo na e celebracion di e 70 aña di carnaval cu un explosion di beyesa, creatividad y color y Aruba y mundo henter a goza di un parada luhoso yena cu ambiente.
Prome Minister a expresa palabranan di gratitud na tur carnavalista, lider di grupo, boluntario, musico y tur persona cu a aporta pa haci e carnaval exitoso. Tambe Prome Minister a gradici SMAC, KPA, Brandweer, Serlimar, DOW, CMO y Rode Kruis cu a percura pa e hospital riba e ruta, y tur otro instancia cu a yuda cu nos Carnaval 70.
“Pabien Aruba cu un bunita celebracion di 70 aña di carnaval. Awor nos ta sigui cu e mesun entusiasmo, creatividad y positivismo pa nos hiba nos pais padilanti. Aña 2024 ta e aña cu nos ta bay mira e prosperidad yega na e punto cu e lo stabilisa y yega den cada hogar. Esaki ta e meta y compromiso di Gabinete Wever-Croes II y nos ta trahando duro pa cumpli cu ne. Tambe nos ta conta cu e esfuerso di cada ciudadano, pa nan sigui traha duro pa hiba nan famia padilanti y asina ta hiba Aruba padilanti”, Prome Minister a finalisa bisando.
