The content originally appeared on:
Diario
Hues a honra abogado su peticionnan
ORANJESTAD (AAN): Diahuebs mainta mester a tuma lugar e caso penal cu Ministerio Publico a cuminsa contra e muher di inicial I.R., acusa di pa medio di falsificacion den e periodo 29 di Augustus 2015 pa 28 Januari 2020 a pone cu Censo a inscribi’e den registro di Bevolking y a inscribi su yiu. Ta asina cu abogado mr. Carlo a presenta pero e muher I.R. no.
Laga psycologo evalua muher: Hues a bisa cu mr. Carlo a manda carta pidi pa pospone e caso y Hues ta honra e peticion aki. Abogado a pidi Hues pa duna orden pa laga traha raport di psycologo. E abogado a splica cu ta door di malesa mental cu e muher tin, e no tabata mira nada malo di loke el a haci.
E abogado a bisa cu I.R. tabata bou tratamento di psychiater pero e psychiater no ta traha mas. Awor e abogado tin relato di investigacion cu ta mustra e tratamento cu I.R. ta hayando y remedi cu e ta bebiendo.
Fiscal ta contra: Fiscal a bisa cu e ta contra di laga haci investigacion. Fiscal a remarca cu por bien ta cu awor cu e muher ta worde persigui, e ta haci esaki. Fiscal a bisa cu e no ta mira motibo di investigacion psycologo.
Abogado ta reacciona: Abogado mr. Carlo a reacciona cu e ta lamenta cu Fiscal ta rechaza. El a splica Hues cu e muher tabatin relacion cu un Moslim y tabata worde abusa sexual y maltrata. Nan a haya yiu y e tabata na Venezuela y a huy bay Colombia. Tabatin un procedura pa e yiunan bay Libanon cerca e tata. Na final 2008. I.R. a dicidi bay Libanon cu e yiunan. E abuso di e homber a sigui y esey a pone cu na 2009, I.R. a huy for di Libanon.
Na Colombia el a haya paspoort y a bay Venezuela pa busca manera pa haya su yiunan back. Na Augustus 2012, I.R. a haya paspoort Venezolano y a ripara cu su nomber ta incorecto skirbi. El a reclama y el a worde bisa cu e mester bay Maracaibo pa regla esaki. Door di fayo administrative esaki a sosode. E abogado di I.R. na Venezuela a bis’e lag’e asina cu no ta un problema.
Na 2014 na Aruba, I.R. a bin haya sa cu e informacion no ta corecto y a tuma contacto cu e abogado na Venezuela. E abogado a bisa cu si I.R. cambia su identidad e lo perde su derecho pa haya su yiunan secuestra na Libanon. Abogado mr. Carlo a bisa Hues cu esaki ta motibo cu e muher a keda usa e identidad cu el a haya for Venezuela.
Investigacion laga di desea: E abogado a cuestiona e forma con investigacion a tuma lugar. E abogado a mustra Hues un cantidad di documento cu e tin y cu falta mas pa e haya pa despues manda esakinan pa Hues y Fiscal. Na opinion di abogado mr. Carlo, solamente psycologo lo por haya sa tur loke ta sosodiendo door di papia cu I.R.
Fiscal a remarca cu ta coy kens abogado ta bisa cu no tin suficiente investigacion. Na opinion di Fiscal, tin masha hopi hende cu identificacion falso na Aruba. Cada un tin un storia. E realidad ta cu na 2014, e muher I.R. a mustra un paspoort falso y laga Douane stempel esaki. El a usa esaki pa laga inscribi su mes na Censo. Fiscal ta haya cu I.R. a tuma haci Censo y esaki pa ley ta castigabel. Fiscal ta haya cu esaki no por pasa sin mas y mester tin castigo.
Hues a honra peticion: Hues a bisa cu e ta pospone e caso y a instrui pa Reclassering pidi un psycologo laga investiga e muher. E caso a keda pospone pa tempo indefini.
