Buki di ‘Max y e taki encanta’ a yega Biblioteca

ORANJSTAD (AAN): Biblioteca Nacional a ricibi e buki pa mucha ‘Max y e taki encanta’ for di Tanchi Esme! Un buki pa mucha na Papiamento.

Esaki ta otro fabula cu tin varios mensahe den dje, cu tur mucha ta igual, ta papia tocante diferente fruta cu ta crece aki na nos dushi isla Aruba y e aventura di Max.

   ‘Tanchi Esme’ ta e nomber di cariño di señora Esmeralda Tromp-Jacobs y Tanchi Esme a participa diferente biaha na e Festival di Buki pa Mucha. Esaki ta un buki bunita y colorido ilustra pa Gairo Tromp.

   Na Biblioteca nan ta masha contento cu un otro publicacion pa e coleccion hubenil. E coleccion di buki pa mucha na Papiamento ta sigui crece y por ofrece tur mucha un buki pa lesa.

   E buki a keda publica cu sosten financiero di Unoca y Setar NV. Diseño grafico pa e produccion aki ta di Sheila Werleman y Marlon van der Linde a haci coreccion di Papiamento.

   Un conseho di Tanchi Esme: “Tur mucha ta biba den nan mundo di fantasia. Nos, hende grandi, nunca mester stroba nan di biba nan infancia. Laga nan mente explora nan propio mundo encanta.”

Por sigui lesa mas tocante Tanchi Esme su bukinan riba website di biblioteca of pasa fia e buki.