Hopi interes pa sesion informativo di Ombudsman pa instancianan

ORANJESTAD (AAN): Ombudsman di Aruba a anuncia recientemente cu e ta organiza un sesion informativo pa

instancianan cu ta cay bou di e Landsverordening Ombudsman dia 5 y 7 di Mei venidero. Instancianan masalmente a mustra interes y den par di dia tur dos sesion a yena. Al momento no por tuma mas registracion.

   Durante e sesion aki Ombudsman, mr. señora Jurima Bryson lo informa entre otro tocante e Landsverordening Ombudsman, e mandato y rol di Ombudsman. Ademas Ombudsman lo splica e normanan di conducta apropia y tratadonan cu ta aplicabel pa e trabao di Ombudsman. Tambe Ombudsman lo enfoca riba e derecho di e ciudadano pa por entrega un keho, y mucho mas.

   Ombudsman lo keda ofrece e sesionnan aki pa instancianan. Ademas di ta informa regularmente via nos canalnan online, Ombudsman ta consciente di e balor agrega door di tin tambe momentonan unda cu Ombudsman y instancianan ta topa personalmente.

   E enfoke di Ombudsman no ta solamente riba nos instancianan, pero tambe riba nos ciudadanonan. Pronto Ombudsman ta drenta diferente barrio, asina dunando servicio na personanan cu ta desea di entrega keho mas cerca di cas.

   Pa comunidad keda na altura di tur desaroyo, corda cu tin e website di Ombudsman na:

www.ombudsman.aw y tambe por haye riba Facebook.