The content originally appeared on:
Diario
Pronto e lo divulga tur e ‘berdad sunu’
ORANJESTAD (AAN): E ta un dia special pa e conocido ex-locutor y musico, Landho Garcia. Awe Diamars 23 di April 2024, e ta cumpli exactamente 30 aña cu e ta ‘sano y sobrio’.
“Awe pa E gracia di Dios, celebrando 30 aña sano y sobrio”, ta loke Garcia di 76 aña di edad a declara na DIARIO e siman aki. Manera ta conoci, pa varios decada den pasado e tabatin problema cu drogadiccion. Pero 30 aña pasa cu hopi fe y debocion, celebrando gloria di Dios, el a sa di sobrepasa e temponan scur ey.
El a splica tambe, cu pronto e lo bay ta bay ta dunando su testimonio cu e ta bay yama ‘E Berdad Sunu’, unda e lo divulga pa tur hende sa con el a derota Droga! E lo splica con Cristo ta e victoria cu a pone laga e vicio atras.
E lo splica con e tempo aya, e mes tabata e mafioso, e adicto, e corupto, y sinta na mic di emisora, tabata manda mensahenan toxico hasta via radio… pa despues comberti su mes y awor tin hasta e prome programa di alabansa na Hit 94 FM.
Landhito ta lanta tur marduga for di 4:00 am caba pa haci oracion na rudia. Esey ta su desayuno spiritual, y henter dia bo ta haye completamente bisti na blanco. Cu su cabes na halto, ta gradici Dios pa su caminda nobo, caminda limpi, y caminda puro.
DIARIO ta felicita Landhito El Sanito cu su 30 aña di hiba un bida ‘clean’.
