The content originally appeared on:
Diario
ORANJESTAD (AAN): Den fin di siman cu a pasa, e crusero ‘Vasco da Gama’ opera pa Nicko Cruises di Alemania,
a haci su prome bishita na Aruba. Na e ocasion aki, un delegacion di Aruba Ports Authority, Aruba Tourism Authority, y nan agencia SEL Maduro & Sons a bay topa cu e capitan y esnan na mando.
Na e ocasion aki, a haci entrega di plaquette conmemorativo pa e evento special aki.
Durante e entrega di plaquette, e Cruise Manager di Aruba Tourism Authority, esta Monica Bos a yama e barco y su capitan Adrian Firsov un bon bini na nomber di Gobierno, di ATA, y pueblo di Aruba.
E crusero aki ta un simbolo berdadero di luho contemporaneo sofistica. E barconan di Nicko Cruises ta mantene un standard halto, similar cu hotelnan di 4- of 5-strea.
Despues di Aruba, e barco a sigui pa Curaçao, unda algun huesped a baha pa regresa nan pais, despues di casi 6 luna di viahe global. Pasaheronan nobo a subi na Curaçao pa sigui. E barco lo yega Lisboa (Portugal) dia 8 di April 2024, despues di bishita e.o. Barbados, Grenada, Sao Vicente Island, Islanan Canario, y Madeira.
