Hendrik Tevreden ta aplaudi cu awor pa ley muchanan tin di wordo scucha den caso di divorcio

​

Plan di Mayor ta pa proteha e Mucha

ORANJESTAD (AAN): Despues cu den Parlamento a haya un aprobacion unanimamente, e ley di Plan di Mayor ta bay den ehecucion awe diabierna 1 di Maart.

            Desde diabierna muchanan menor di edad lo hunga un rol crucial den bida di nan mayornan cu kier separa. Ley di Plan di Mayor ta encera cu mayornan di yiunan menor di edad cu ta bay separa of divorcia ta obliga pa motibo di ley pa traha un documento legal yama ‘Plan di Mayor’ unda lo stipula con nan lo bay atende cu nan yiu despues di nan separacion.

            Separacion ta un di impactonan grandi riba bida di un mucha, mescos cu un matrimonio cu problema tambe ta. Sinembargo, parehanan ta separa cu rabia contra otro lubidando cu e mucha no tin e rabia ey riba su mayor.

            Den un relacion saludabel entre mayor y yiu, bo no por pa motibo di bo rabia contra bo pareha perhudica e continuacion di e relacion. P’esey tin derechonan Internacional pa proteha muchanan contra esakinan, Parlamentario y Lider di Fraccion di MEP, Hendrik Tevreden a duna di conoce.

            1 di maart 2024 e derecho aki ta bay den practica na Aruba tambe. E ley Plan di Mayor ta bay na vigor y ta nifica cu divorcio o separacion despues di e fecha aki tin di traha un plan na bienestar di e yiu.

            Mayornan cu tin intencion di separa lo wordo apunta na bureau Plan di Mayor na Sabana Blanco 68-c door di corte di Aruba of por ‘walk in’ pa por haci un plan hunto cu e profesional riba e topico aki. 

Con e proceso aki ta bay?

            E profesional ta scucha ambos mayor, pero mas importante ta scucha e mucha mes. Asina ta haya sa den ki fase di conflicto e mayornan ta haya nan mes y lo referi e mayornan na e intervencion cu mas ta pas pa nan situacion.

            Si tin un caso unda cu mayornan ta comunica cu otro bon y nan mes por traha e plan di mayor. E profesional lo asisti y laga mes entrega e plan na corte.

            Si acaso cu e comunicacion entre e pareha no ta asina bon, e famia lo wordo recomenda na un ‘family mediation’ esaki ta unda cu e profesional ta hiba un ciclo di combersacion cu e pareha separa y cu e yiu tambe. Asina hunto ta yega na un Plan di Mayor y Plan di Mucha.

            E trayecto tin un duracion di maximo 6 siman. Mayornan den un estado di problema mas critico y compleho ta wordo recomenda e intervencion di ‘ouderschapblijft’, y den un trayecto di maximo 9 luna lo percura pa por yega na un Plan di Mayor y Plan di Mucha.

            Asina ta cambia historia di e  mucha cu awor tambe ta wordo proteha di un forma den caso di un separacion. E intencion ta pa no separa y tin un hogar saludabel pa crecemento di e muchanan, pero e realidad ta cu no ta tur ora esey ta e caso y Plan di Mayor tey awor pa trece ayudo pa famianan durante y despues di un separacion, cu intervencionnan enfoca riba mayornan y intervencionnan enfoca riba e mucha.

            Hopi bes, muchanan ta wordo separa di nan mayor pa motibonan cu no tin di haber cu nan y esaki ta laga un bashi grandi den nan bida. Pasobra nan mayor ta y lo keda pa semper nan mayor.

            “Nos ta kere cu e ley aki ta bon pa tur mucha cu tin un relacion saludabel cu nan mayornan. Naturalmente tur relacion abusivo no ta wordo considera ni proteha pa medio di e ley aki”, Tevreden a enfatisa.