Adiccion den combinacion cu schizophrenia ta hopi grave na Aruba

Parlamentario Gino Goeloe:

• Algo cu mester tuma hopi na serio
• Que hubo pone KPA tambe den Stuurgroep 

ORANJESTAD (AAN)-- Den entrevista cu Parlamentario Gino Goeloe, di fraccion Futuro, el a comenta cu desde pandemia di Covid-19 e temanan di salud y cuido mental, a bin dilanti mundialmente, y sigur na Aruba tambe.

   Goeloe a bisa cu ademas di salud y cuido mental a bin dilanti e tema di adiccion den combinacion cu schizophrenia, cu tambe ta hopi grave aki na Aruba.

   “Tin hopi caso na casnan y mi sa esey tambe di Stichting Hunto, unda mi tin contacto cu nan, caminda cu nan ta wak cu e casonan tambe ta aumentando, y edadnan ta bahando. E ta algo cu nos tin cu tuma hopi na serio y duna, den e caso aki, Stichting Hunto su personal cu e mester. Den hopi ocasion mi a bisa cu Stichting Hunto y tambe Respaldo mester di e personal necesario. Den e parti di enfermeria y cuido sikiatrico, ta hopi abao pasobra nos no tin hendenan studia den e ramo ey, y e ora ey tin cu cuminza wak rond di Aruba, si tin hende pa traha den e mundo aki.

   P’esey den un combinacion cu Colegio EPI, unda cu EPI tin nivel 4, nos ta bay  pone mas atencion na psikiatria na Aruba, pasobra e casonan di problema di salud mental ta subiendo”, Goeloe a indica.

E parlamentario a agrega cu papiando cu Colegio EPI, nan ta duna e opleiding di cuido riba tur tereno, pero e ta kere cu mester pone hopi enfasis riba e parti di psikiatria, pa prepara Stichting Hunto y Stichting Respaldo pa haya mas personal profesionaliza, pasobra mester profesional pa traha den e ramo aki.

   “Tin un stuur groep, unda cu tur e profesionalnan ta sinta hunto; Respaldo, Stichting Hunto, Wit Gele Kruis, Sociale Zaken, y mi ta kere cu eyden un persona di KPA mester por sinta eyden, den e stuur groep ey, p’e tambe por tende kico ta pasando. Pasobra mi ta kere cu esey ta e caminda cu nos por cana, mi sa cu tin e Veiligheidshuis, cu tin tur e profesionalnan y tambe KPA den dje, den e Stuur Groep tin e Departamento di Psikiatria unda tambe mester tin un polis cu por sinta den e reunionnan ey p’e tambe por tende kico ta pasando den e mundo aki, pafo”, Gino Goeloe a señala.

   El a splica cu hopi biaha enberdad bo mester tin e adresnan unda cu tin casonan di problema di salud mental, pasobra con cu bay bin bo ta haya nan toch.

   “Pasobra prome persona cu nan ta yama ta polis. Polis ta wordo yama ora cu e persona aki bira psicotico, ta kibra cos den cas, ta cana cu cuchio rond di cas, ta menaza famia, ta polis ta wordo yama. “Awo, polis mester sa tambe cu ken e ta deal, pa ora cu e bay eynan, mester bay cu un team pa reforza, entre cuater pa seis polis, esey ta sigur, y tambe cu Crisis Team. Pasobra ora bo ta bay den cas di un persona den crisis, ora e ta alucina, e ta tende stem,e persona aki ta hopi agresivo y bo mester sa con pa papia cu ne, con pa deal cu e situacion aki, pa trankiliza e persona, y tin biaha, e no ta bay”, Gino Goeloe a remarca.