Fundacion Home Aliansa Nobo Rehab Center a uni na campaña nacional Cuida Aruba

ORANJESTAD (AAN): Gobierno di Aruba ta aplaudi Fundacion Home Aliansa Nobo Rehab Center

como e mas reciente organizacion comunitario cu a uni su forsa na campaña nacional Cuida Aruba.

   E anuncio a tuma luga na Mahuma, den presencia di Prome Minister Mike Eman, Sigfried Valentino Koeiman di Home Alianza Nobo Rehab Center y Robert Candelaria, Secretario General di Ministerio di Asunto General.

  Cuida Aruba ta sigui crece como un movimiento nacional caminda gobierno, sector priva, y NGO’s,  scol, iglesia, boluntario y ciudadano ta traha hunto pa mantene Aruba limpi, bunita y bon cuida. Cu e participacion di Home Alianza Nobo Rehab Center, e campaña ta amplia su base comunitario y ta fortalece e mensahe cu cuida Aruba ta un responsabilidad comparti.

   Durante di e encuentro, Prome Minister Mike Eman a resalta cu e exito di Cuida Aruba ta basa riba cooperacion entre gobierno y comunidad. Actualmente, e centro ta brinda guia y acompañamento na 26 participante, combinando apoyo spiritual cu formacion personal pa yuda nan bira ciudadano activo y responsabel den nos sociedad.

   Sigfried Valentino Koeiman a expresa cu e fundacion kier aporta un "granito di arena" na Aruba door di participa activamente den Cuida Aruba. El a indica cu e residentenan di Home Alianza Nobo Rehab Center lo contribui cu accionnan di limpiesa den Mahuma y bisindario, como un forma concreto di duna bek na e sociedad cu ta brinda nan un oportunidad nobo.

   Secretario general di Ministerio Asunto General, Robert Candelaria a destaca cu Cuida Aruba ta bay mucho mas leu cu solamente haci caminda of bario limpi. E iniciativa ta invita tur hende pa cuida Aruba den un sentido mas amplio, door di fortalece nos sentido di responsabilidad, solidaridad y compromiso cu nos pais. Tambe a enfatisa cu e trabao cu Home Alianza Nobo Rehab Center ta haci pa yuda personanan sali for di adiccion y reintegra den sociedad, ta un ehempel di con cuida hende tambe ta nifica cuida Aruba.

   Gobierno di Aruba ta aprecia e compromiso di Home Alianza Nobo Rehab Center y ta invita mas organizacion, empresa y ciudadano pa uni nan mes na Cuida Aruba. Door di traha hunto, cada esfuerso, grandi of chikito, ta contribui na un Aruba mas limpi, mas bunita y mas fuerte pa tur.