Accident fatal cu motorcycle riba Green Corridor

Jeanemarc van der Biezen a perde su bida

• El a bira e di 8 morto den trafico pa 2026 

ORANJESTAD (AAN): Un situacion a presenta riba Diahuebs pa 12:57 pm, ora cu Central di Polis a cuminza ricibi varios yamada, indicando un accident fuerte riba Green Corridor.

   E prome informe ta papia cu un accident a caba di socede riba Green Corridor entre un auto sedan Hyundai color blanco, y un brommer Suzuki Hayabusa, riba e caminda di Pos Chiquito bayendo pabao.

   Mientras tanto diferente unidad di Polis di San Nicolas a mobilisa pa eynan, y tabata ricibi extra informacion cu e manehador di e motorcycle ta benta abao y no ta reacciona.  Centro di Alarma na su turno a manda Ambulans tambe pa e lugar.

   E prome unidad di Polis cu a yega, a haya e accident poco pabao di rotonde di Pos Chiquito.  A bin haya e motorcycle color blanco benta abao, cu e motociclista abao banda panort di caminda riba acera.  Un poco mas leu e Hyundai Accent color blanco a bay para.

   Nan a nota mesora cu e manehador di e motorcycle no ta reacciona, y a pidi pa Ambulans yega aun mas rapido.  Ora cu Paramediconan a yega, y a baha check e victima, a bin nota cu e no tin ningun señal vital mas.  Despues a bay check e chauffeur di e Hyundai Accent tambe.

   E Paramediconan a informa Polis pa notifica Docter pa bin eybao.  Mientras tanto Team Forensico di BFTO y tambe Specialista di Trafico di Polis a wordo manda pa eynan.  Algun rato despues, Docter Forensico a constata morto di e manehador, esta Jeanemarc van der Biezen naci dia 27 januari 1994 na Aruba, pues tin 32 aña di edad.  El a bira di ocho victima fatal di trafico di Aruba, den e 6 lunanan di aña.  Tin indicacion cu e ta bin di bario di Sabana Basora.

    DIARIO a nota cu Departamento di Slachtofferhulp tambe a presenta pa duna sosten na famia y conocirnan.  A nota presencia di Alto Comisario Arnhem tambe.

   DIARIO y Cuerpo Policial Aruba ta manda palabra di condolencia na famia di e fayecido.