Parlamentario Endy Croes ta reacciona riba declaracion di Minister Gerlien Croes

ORANJESTAD (AAN)- Parlamentario Endy Croes a reacciona, den entrevista cu DIARIO, tocante e declaracion di Minister Gerlien Croes,

tocante e mal estado di e Compleho Deportivo Guillermo Prospero Trinidad, y e ta cuestiona e mandatario cu el a keda cu e yabi di e edificio pa un aña largo.

   Parlamentario Croes ta lamenta locual e Minister a bisa, y el a expresa cu enberdad e ta un proyecto di un magnitud hopi grandi, y a señala cu AVB y Club di Atletismo ta hopi contento pa e bon material cu nan a haya te aworaki. El a bisa cu enberdad ta un stadion di 70 aña di existencia, y cu desde 2026 e ta afgekeurd cu ningun wega por a tuma lugar eyden. Teamnan di Aruba mester a bay hunga te den exterior e tempo ey, te cu el a bira Minister cu a bin cu proyectonan grandi.

   Incluso na aña 2021 el a sinta cu FIFA, den e compleho deportivo aki mes, na su prome of dos luna como Minister.

   El a bisa cu FIFA a splica cu nan por a inverti miyones na Aruba, pero tabata tin dos condicion. Un ta cu Gobierno  mester a acredita un stadion na FIFA, pa weganan cu mester wordo hunga na cas, y pa proyectonan grandi manera futbol, y traspasa e tereno pa e club pa 30 aña., loke ta dificil pasobra no por hala for di nan.

   Parlamentario Croes a bisa cu e tempo ey e por a sinta busca fondonan den temponan dificil, apenas un aña saliendo for di e pandemia di 2020, pero e problemanan cu Hulanda, etc., pero cu curashi y boluntad a scoge pa haci esaki den fase.

   El a señala cu tabata tin un tribuna afgekeurd e tempo ey, na man drechi ora bo drenta stadion, y Bohama ta e compania cu a haya e prome fase di renovacion y full e tribuna, e baño, etc., a keda masha bunita, segun Endy Croes. Ademas e parti di coriente a wordo renoba e tempo ey.