Apertura oficial di Copa Gubernamental 2026

ORANJESTAD (AAN): Den fin di siman a tuma luga e ceremonia di apertura di e Copa Gubernamental 2026 conhuntamente cu representante di e teamnan, invitadonan y fanaticonan.

   Durante e apertura a rindi homenahe na tres legendario di SETAR Softball Team, unda cu a reconoce Sr. Marcolino Werleman, Sr. Gregory Kootes y Sr. Maximino Garcia pa nan aporte na e team durante añanan.

   Como invitadonan, tambe tabata presente Director di SETAR, Sr. Roland Croes, y Minister di Deporte, Gerlien Croes, hunto cu Sr. Hendrik Bareño di Pevesa pa tira e prome pitch y habri oficialmente e torneo di Copa Gubernamental 2026 cu entretenimento pa Zeta Band.

   Cu inauguracion di e Copa Gubernamental, e weganan ta sigui te cu diasabra 27 di juni, unda cu e teamnan cu avansa lo hunga e gran final pa titula Campeon di Copa Gubernamental 2026 y Campeon Damas di Copa Gobernamental 2026.

   SETAR ta invita pueblo di Aruba completo y e fanaticada pa bishita veld di Kudawecha e siman aki y disfruta di e dushi ambiente deportivo como tambe un bar y cushina bon surti y entretenimento. Sin lubida, lo tin screennan disponibel cu transmision di e weganan di Copa Mundial 2026 pa e fanaticonan di futbol.

   E organizacionnan participante pa e categoria cabayero ta: Douane, DIMP, NV Elmar, Setar NV, KPA (Polis), Wardacosta, Onderwijs, Brandweer, Post Aruba N.V., Serlimar, APA, WEB Aruba N.V., AAA (Airport), HOH (Hospital) y CEA.

   Den categoria damas, e organizacionnan participante ta: KPA (Polis), HOH (Hospital) y NV Elmar “Chispita Power”.

   E aña aki, Elmar ta participa pa prome bes cu su team femenino di softball: Chispita Power. E team aki a wordo lansa aña pasa na november pa celebra 75 aniversario di Elmar, cu e proposito di promove deporte y bienestar entre empleadonan femenino di e compania di electricidad.

   Potretnan aki pa cortesia di Ministerio di Deporte, Setar NV, y tambe SportszoneAruba.