No por depende solamente riba aumento di salario minimo sin mitiga e posibel efectonan

Segun Presidente di Sindicato FTA Hose Figaroa:

ORANJESTAD (AAN): Tema di aumento di salario minimo y su desaroyo ta keda un tema interesante. Presidente di Sindicato FTA, Hose Figaroa den un entrevista a enfatisa cu aumento di costo di bida ta un problema mundial y ya caba diferente pais a cuminsa haci protesta.

   Na Aruba, na unda cu basicamente tur cos ta wordo importa, cualkier aumento internacional lo afecta costo di bida directamente. Segun Figaroa, tin diferente manera pa atende cu aumento di costo di bida, mientras cu mester mantene y mehora e poder di compra di e trahado miho posibel.

   Un manera, el a remarca, ta door di aumenta entrada di e trahado y un otro manera ta door di alivia gastonan di e trahado. Esaki por wordo haci door di reduccion di BBO entre otro. Esaki lo baha gasto di tur hende como tambe lo baha gasto di e productonan esencial pa biba.

   El a enfatisa cu punto di salida di FTA ta cu mientras cu salario minimo no ta igual cu minimo di subsistencia (bestaansminimum), cualkier aumento di salario minimo semper ta hustifica pasobra hende no por traha mas di un trabao pa por sobrebibi.

   Sinembargo, di otro banda, un aumento di salario minimo riba su mes no necesariamente ta bay soluciona e problema. El a splica cu si e aumento aki na su turno hiba na un aumento tambe di e minimo di subsistencia, e ora lo causa e efecto di ‘pushi ta core tras di raton’, nunca e lo alcans’e pasobra cada stap cu e dal padilanti, e raton tambe ta dal stap dilanti. Segun e, cu si di berdad kier pa nan yega otro, mester tuma paso pa e raton no sigui core. 

   Splicando e comparacion aki, el a indica cu banda di duna aumento den salario minimo, mester bin cu medidanan cu ta mitiga e gastonan adicional cu aumento di salario minimo ta bay trece cu ne, cu comerciantenan ta bay hinca bek den prijs di producto.

   Segun Firgaroa a reitera, esaki tambe ta loke Sociaal-Economische Raad (SER) a conseha Gobierno di Aruba desde januari caba. SER a indica den su conseho cu ta di acuerdo pa move salario minimo den direccion di minimo di subsistencia, pero pa por logra e meta, cu no ta hisa salario minimo sino pa mehora poder di compra di e trahado, no por depende solamente riba aumento di salario minimo. Mester tuma otro medida pa mitiga e posibel efectonan di un aumento di salario minimo.