Cas Editorial Prometheus a presenta prome muestra di buki ‘Voorvechter’ di Mike Eman

Durante encuentro di GNA na Den Haag

ORANJESTAD (AAN): Durante e encuentro anual di Genootschap Nederland-Aruba (GNA), cu a tuma luga na Paleiskerk na Den Haag, prome minister Mike Eman a ricibi un prome muestra di su buki Cornelis Hendrik Eman: Voorvechter. Thomas Coenraads, hoofd bureauredactie di Uitgeverij Prometheus na Amsterdam, a haci e entrega na nomber di e cas editorial.

   Den su discurso, Coenraads di e Cas Editorial, el a describi e obra como "un biografia monumental di un persona sumamente special", skirbi door di Mike Eman tocante su bisabuelo, Cornelis Hendrik Eman. E buki, cu tin como subtitulo Het ontwaken van Aruba, ta relata historia di un lider cu na cuminsamento di siglo 20 a lucha pa miho condicionnan di bida na Aruba.

   Como miembro di Landraad, Cornelis Hendrik Eman a lucha pa miho enseñansa, acceso na awa, oportunidad economico y construccion di un waf cu lo conecta Aruba cu mundo exterior. E  historia ta mustra con pueblo Arubano a cuminsa compronde cu su futuro no tabata depende solamente di e decisionnan di e gobernantenan colonial, sino tambe di hende cu tabatin e curashi pa forma nan propio futuro.

   Durante su presentacion, Coenraads tambe a comparti un comentario di ex-prome minister di Hulanda, Jan Peter Balkenende, kende a destaca e importancia di e buki pa compronde e relacion entre historia, responsabilidad social y bienestar comun. Balkenende a haci e pregunta: "Con nos por bolbe haci e bon comun un principio cu ta guia gobernacion y sociedad?" Cu esaki e ta conecta e historia di Cornelis Hendrik Eman cu e reto actual pa pone bienestar comun central den gobernacion y sociedad.

   Coenraads a expresa su aprecio pa e dedicacion di Mike Eman den e investigacion historico cu a conduci na e buki. Pa realisa e obra, Eman a profundisa den varios archivo, corant historico, documento colonial y historia di su famia. Cu Voorvechter, Mike Eman no solamente a skirbi un biografia di su bisabuelo, sino tambe historia di un isla.

   E presentacion a forma parti di e encuentro anual di GNA, caminda prome minister Mike Eman tambe tabata un di e oradornan, hunto cu Dr. Aubrich Bakhuis y Dr. Wessel Geursen. E programa tambe a inclui un introduccion di presidente nobo di GNA den persona di Marvin Sutherland. E buki Cornelis Hendrik Eman: Voorvechter lo ta disponibel den libreria entrante 27 di November 2026 en adelante.