Ministro Geoffrey Wever a pone esaki...
- Proyecto pa check proposicionnan
- Ferry por ta un alternativa pa pasashi caro cu avion
ORANJESTAD (AAN): E proyecto “Request for proposals for a ferry connection between Aruba and Curaçao” pa haci e investigacionnan necesario pa wak si ta posibel pa por yega na un operador di ferry pa establece un conexion di ferry di pasahero entre Aruba y Corsou ta avansa cu un paso importante. Despues di un proceso di destaho publico a otorga e proyecto di consultancy na Maritime & Logistics Consulting Group (MLCG) S.A. Cu e desaroyo aki, Gobierno di Aruba ta sigui transforma e vision di ferry di pasahero entre e dos islanan den un proyecto concreto.
Minister Wever a duna di conoce cu e proyecto aki ta forma parti di Landspakket tema Economia y ta e resultado di e cooperacion economico entre Aruba y Corsou, cu a haya un base formal cu e Memorandum of Understanding (MoU) firma na 2023 di cual realisacion di un conexion di ferry entre e islanan ta wordo considera un aporte na e cooperacion regional aki. E meta ta pa mehora e conectividad entre e dos islanan y stimula cooperacion economico.
Actualmente, transporte di pasahero entre Aruba y Corsou ta depende principalmente di conexionnan aereo, cu disponibilidad limita y costo di ticket cu por representa un obstaculo pa hopi hende. Un servicio di ferry por ofrece un alternativa adicional di transporte pa local y pa turista facilitando movemento entre e dos islanan.
E proceso pa selecciona e compania externo a conoce dos etapa. E destaho a wordo termina despues cu tur oferta financiero a resulta mas cu 20% riba e costonan estima inicialmente. Posteriormente a sigui cu un procedura di negocacion tocante e prijs. Segun e evaluacion aki MLCG a logra e puntuacion mas halto. Hulanda por medio di Landspakket ta pone fondo disponibel pa e financia e proyecto aki den forma di subsidio.
E scope y structura di e proyecto ta lo siguiente: e compania lo cuminsa cu investiga e ‘preconditions’ y e posibilidad inicial pa un conexion di ferry di pasahero entre Aruba y Corsou. Si e resultado e prome fase ta positivo, e compania lo ta encarga cu e preparacion, ehecucion y completacion di e ‘request for proposals’ pa un futuro destaho di operador di ferry di pasahero entre Aruba y Corsou. Esaki no ta significa cu un operador di ferry a wordo contrata of cu un fecha definitivo pa inicio di e servicio a wordo determina.
Minister Wever: "Pa hopi aña, un conexion di ferry entre Aruba y Corsou tabata un deseo di hopi hende. Nos meta ta pa transforma e deseo aki den un posibilidad concreto y sostenibel. Nos ta comprometi pa realisa proyectonan cu por contribui na desaroyo economico di Aruba, pero semper cu responsabilidad profesional. Mi ta agradece nos partners Corsou pa ehecuta e proyecto aki hunto y mi ta agradece Hulanda pa kere den e proyecto y haci e financiamento posibel di esaki. Cu e paso aki, nos ta pone e fundeshi necesario pa haci e proyecto realidad."