Prome Minister Mike Eman a bishita Willem III Toren den fase final di restauracion

ORANJESTAD (AAN): Prome Minister Mike Eman a haci un bishita na e monumento historico Willem III Toren na Fort Zoutman,

cu actualmente ta den fase final di restauracion. Durante e bishita, Prome Minister a haya un recorido guia pa Serge Pluijmen, werkvoorbereider di ALBO, y Shannon Quandt, projectleider di ALBO, kende a duna splicacion tocante e trabounan cu ta tumando luga.E restauracion di e monumento historico ta un proyecto importante pa conservacion di patrimonio cultural di Aruba. Ta programa pa entrega e proyecto na final di januari 2027.

Durante e recorido, Prome Minister Eman a enfoca riba e importancia historico di Fort Zoutman y Willem III Toren, cu ta dos di e edificionan di piedra mas bieu di Aruba.Eman a splica cu, aunke hopi hende ta mira e forti y e toren como un solo totalidad, nan a wordo construi den dos periodo diferente. Fort Zoutman a wordo construi na 1796, mientras cu Willem III Toren a wordo construi na 1868, casi 100 aña despues. Originalmente, e toren tabata funciona como un faro pa guia e barconan y boto di e piscadornan.

Prome Minister a recorda tambe cu den pasado Fort Zoutman tabata un centro importante di administracion di Aruba, caminda diferente servicio publico, incluyendo husticia, duana y polis, tabata funciona.Den e contexto historico aki, Eman a anuncia cu dia 28 di november lo tin un presentacion di buki na Fort Zoutman tocante Cornelis Hendrik Eman, kende tabata miembro di Landraad rond di aña 1900. Segun Prome Minister, Cornelis Hendrik Eman a lucha pa Aruba haya mas bos y espacio pa determina su propio e prioridadnan. E tabata boga tambe pa un trato mas husto den tarifa di importacion y exportacion. Eman a destaca cu e lucha aki ta refleha e conciencia creciente di pueblo di Aruba durante e periodo ey.

Durante e bishita, Prome Minister Eman a expresa su aprecio pa e trabou cu ALBO y su empleadonan a realisa. E restauracion di monumentonan no ta solamente importante pa conserva edificionan historico, sino tambe pa fortalece e identidad di pueblo di Aruba."Cada monumento cu nos ta restaura ta fortalece e fundamento di ken nos ta y na unda nos ta pertenece", Prome Minister Eman a expresa.

Di su parti, Serge Pluijmen di ALBO a splica cu e trabounan principal a inclui reparacion di scheurnan den e structura di e toren, instalacion di un dak nobo, trabounan di verf y reemplasa diferente parti traha di palo.Segun Pluijmen, specialmente e reparacion di e scheurnan a exigi hopi atencion y preparacion tecnico, considerando cu esaki ta forma e base di e restauracion. Actualmente, e proyecto ta den su ultimo fase.

Prome Minister Eman a gradici tur e empleadonan di ALBO pa nan dedicacion y e calidad di e trabou realisa, destacando cu conservacion di e monumentonan historico ta contribui na proteccion di e historia y identidad di Aruba pa e futuro generacionnan.