15 aña di prison exigi pa Adrian Faña cu a hinca su tanta 33 biaha cu cuchiu mata

E acusado a declara cu su tanta tabata abusa di dje sexual

ORANJESTAD (AAN): Ayera mainta, Hues di Corte di Husticia a trata e caso penal cu Ministerio Publico a cuminsa contra e Dominicano, Adrian Faña (A.F) (21) kende ta wordo acusa di asesinato di su tanta Fania Polina riba 2 November 2025. Ta asina cu A.F. a bisa cu su tanta tabata abusa di dje sexual. Dia 2 November 2025 tabatin un discusion y A.F. a perde cabez y puñala su tanta 33 biaha y despues a hink’e den freezer.

Fiscal a exigi 15 aña di prison p’e. Abogado mr. Maduro ta haya cu mester usa castigo hubenil y tambe cu psicologo y psychiater ta haya cu A.F. ta menos responsabel pa su actonan. Den e articulo aki ta concentra riba tratamento di e caso y exigencia di Fiscal. Den un otro articulo ta publica e defensa di abogado di A.F.

FAMIA DI VICTIMA FOR SANTO DOMINGO

E famia di e victima via video conference for di Santo Domingo, tabata sigui e caso di cerca. Tambe abogado mr. Arendsz Marchena a representa famia di e victima Fania Polina. Tambe tabatin familiar cu a viaha for di Santo Domingo y tabata presente den sala di Corte.

Fiscal acusa A.F. di a hinca e dama Fania Polina diferente biaha na curpa cu consecuencia cu el a a fayece. Hues a bisa cu Polis a haci investigacion caminda a interoga diferente testigo, a investiga DNA y a investiga telefonnan.

HINCA TANTA 33 BIAHA CU CUCHIU

Hues a bisa cu lo bay duna cronologicamente kico a sosode. Hues a mustra riba declaracion di e doño di Chalette Suize, R., caminda e victima tabata traha. R. a declara na Recherche cu 1 November 2025 tabata ultimo dia cu e victima a traha. Dia 2 November 2025, el a haya whatsapp di e victimia cu e mester bay cu urgencia Santo Domingo pasobra un familiar ta malo. Dia 4 November 2025, e acusado A.F. a bay serca R. y busca adelanto di 4 mil florin y 2500 florin pa entiero. Tambe cu A.F. a saca cosnan for di e locker di e victima. A.F. a bisa cu 7 November 2025 e lo viaha pa entiero. E hendenan a bisa cu esey no ta posibel pasobra na Santo Domingo ta dera e mesun dia. R. a bay pasa dilanti e cas di e victima pero auto no tey. Despues R. a yama y a haya A.F. na telefoon cu a sera telefoon. R. a notifica Polis y Polis a bay na e cas. Na e cas Polis a mira manchanan di sanger y den mey mey di e cas tabatin un freezer cu laken over di dje. A haya e curpa di e victima Fania Polina. A haya indicacion cu tabatin violencia. Investigacion di patologo y radiologo a constata 33 hinca cu lo a causa morto di Fania Polina. Entretanto A.F. a viaha pa Santo Domingo.

TANTA LO TABATA ABUSA DI ACUSADO

   Hues a puntra A.F. kico a pasa. A.F. a bisa cu el a duna declaracion na Recherche. Segun A.F. pa hopi tempo e victima tabata abusa di dje sexual y verbal. Segun A.F., dia 2 November 2025, mainta tempran su tanta a obligue pa tin relacion sexual cu ne. Ora el a caba, el a bay den su camber, cambia paña y a bay den cushina coy un appel y cuchiu pa pela e appel y come. El a bay den sala pa mira television y sinta cerca di e victima cu tambe tabata sinta den sala. Despues di un rato e tanta a cuminsa discuti cu ne tocante un headphone cu A.F. perde y A.F. a perde cabez. El a bay riba e tanta cu tabata sinta ta mira wak television y a hink’e cu cuchiu den pecho. Segun A.F., ora el a recobra sentido, e tabata riba su tanta cu tabata morto. E ora el a realiza cu e lo bay henter su bida cera. Hues a bisa cu e victima tabatin hopi hinca. A.F. a bisa cu e no ta corda cuanto biaha el a hinca su tanta. Hues a puntra A.F. kico a causa cu A.F. a bira asina rabia y mata su tanta. A.F. a bisa cu awor e ta kere cu e momento ey tur cos a bin den su cabez cu desde cu e tin 14 aña e tabata wordo abusa door di su tanta. El a bisa Hues cu e no ta corda. El a bisa cu nunca den su bida el a haya e reaccion aki. Hues a bisa cu tin raport di psicologo y psychiater cu ta bisa di e estado mental di A.F.

   Hues a bisa cu A.F. a wordo interoga 3 biaha y e no a bisa nada di relacion sexual. Patologo a haya sperma riba e tanta. Den di 4 interogacion, A.F. a bisa cu e tabata wordo obliga door di e tanta pa tin relacion sexual cu ne. A.F. a bisa Hues cu el a entrega su mes pa e para responsabel pa loke el a haci. El a bisa cu el a admiti di a mata su tanta y no a bin cu cuenta. El a bisa cu door di berguenza e no kier a papia cu Recherche di tur e tempo cu su tanta tabata oblig’e pa tin relacion sexual cu ne. 

   Segun A.F. e no kier a papia di esey, pasobra e tabatin berguenza y si hende bay tent’e riba esaki, e lo bay reacciona violento.

HINCA TANTA DEN FREEZER

   Hues a puntra kico A.F. a haci despues cu el a manta su tanta. A.F. a bisa cu el a bay wak video riba internet caminda el a mira cu si hinca e tanta den freezer e no ta bay putri y hole. E tambe a busca manera di haya placa pa bay for di Aruba. A.F. a bisa cu e tabatin un corta na su man y tabata hala su tanta pa e freezer. Esey pasobra riba internet ta mustra cu si e victima sunu, e ta freeze mas liher. Hues a puntra con A.F. a herida su man. El a bisa cu ora el a recobra sentido el a ripara cu e tabatin un corta na su man. Hues a bisa cu durante autopsia a constata cu e victima tabata resisti e ataque di A.F. A.F. a bisa Hues cu e no sa kico tur a pasa. Ora el a recobra sentido el a mira cu su tanta tabata morto.

TESTIGO A SCUCHA GRITAMENTO

   Hues a bisa cu tin un hende ta biba den un apartamento riba tereno di e cas. E testigo a bisa cu 1 November 2025, mas o menos 11’or di anochi, el a pasa banda di e cas pa bay su apartamento y a mira cu e luz den sala tabata cendi y a scucha discusion fuerte entre e tanta y A.F. El a sigui cana y den cushina e gritamento tabata mas fuerte. El a scucha A.F. ta grita varios biaha, “unda mi placa ta”. Ta asina cu A.F. a reaccion y bisa Hues cu esey no ta cuadra pasobra e cu su tanta tabata papia spaño y cu A.F. tabata haya pago pa su trabao y tabata haya e placa riba cuenta di banco di e tanta. E tabata haya e carchi di banco di e tanta pa asina lanta su placa. Segun A.F. e tabata traha 7 luna caba y e tabata sa cuanto placa e tin.

   Hues a bisa cu e testigo a bisa cu e tabata scucha discusion fuerte. Segun A.F., constantemente su tanta tabata discuti cun’e pero e dia ey no tabata nada di placa. Segun A.F., cada rato e tanta tabata discuti pa cosnan cu A.F. ta haci entre otro no a haci limpi, laga cos poni pa su cuenta, etc.

   Hues a bisa cu e situacion no tabata agradabel pa A.F. keda biba eynan. Segun A.F., e no tabatin otro opcion pa busca otro caminda. Segun A.F., e tabata kier spaar su placa pa e bay for di Aruba, bay Santo Domingo of Colombia. Hues a mustra cu e amigo di A.F., N., a bisa Polis cu for di basta tempo A.F. kier bay Santo Domingo y tabata warda cu e tanta ta bay Santo Domingo y pasa e cas riba A.F. su nomber. Segun N., A.F. a bis’e cu e lo bay huur e cas y bay biba na Spaña. A.F. a reacciona cu e no sa pakico N. a bisa asina. El a bisa Hues cu e tabata kier a bay Santo Domingo y no warda riba su tanta. E no tabata kier a keda Aruba.

   Hues a sigui bisa cu e testigo di e apartamento a bisa cu na dado momento a gritamento a stop. Despues mas laat a bolbe cuminsa discusion fuerte y hasta el a scucha un sonido duro. A.F. a bisa cu e no sa di sonido duro y cu e asesinato no a sosode 1 November 2025 anochi sino 2 November 2025 mainta tempran.

   Hues a mustra cu 2 November 2025, 9.05 di mainta, A.F. a manda un mensahe pa e doño di trabao di e tanta, R., pa haya placa. Segun A.F. e tabata busca placa pa e bay for di Aruba. Hues a bisa cu A.F. a pidi hende pa e presta zaag. A.F. a bisa cu riba internet el a mira pa corta e curpa den pida pero ora el a haya e zaag e no tabatin curashi pa haci’e. El a busca ijs di hende pa tira den e freezer.

HUUR E CAS Y BENDE AUTO PA BAY SANTO DOMINGO

   Hues a bisa cu A.F. despues di e incidente a bay papia cu un amigo pa bisa cu su tanta a muri. A.F. a bisa Hues cu ora el a recobra sentido, e tabata pensa den mata su mes of papia cu un amigo. Pesey el a papia cu e amigo. Hues a mustra cu A.F. a papia cu un hende si kier huur e cas. E tabata busca dollar. A.F. a bende e auto di su tanta pa 10 mil florin. E persona a bis’e cu e lo bay haci prestamo na banco. Tambe A.F. a bay cerca e doño R. di trabao di e tanta pa haya un adelanto di 2500 florin. Un siman despues, 7 November 2025, A.F. a viaha pa Panama y despues Santo Domingo.

SCONDE NA SANTO DOMINGO

   A.F. a bisa cu ora el a yega Santo Domingo el a bay na un Airbnb. El a sali trip pero no a bay serca ningun amigo y famia. Hues a bisa cu A.F. a keda algun luna na Santo Domingo. Despues cu a bira conoci cu a haya e tanta morto den freezer, A.F. a cuminsa cambia di Airbnb. A.F. a bisa Hues cu e tabata haya mensahe di famia cu tabata bis’e cu e lo bay putri den prison. A.F. a bisa Hues cu 15 dia despues di a mata su tanta, el a mira entrevista di famia na Santo Domingo caminda nan ta bisa cu ta mihor cu A.F. entrega su mes. Segun A.F. e no tabata por a drumi y tabata pensa di mata su mes. Na dado momento el a dicidi di entrega su mes. El a bisa cu e tabatin suficiente placa ainda pa keda 1 luna biba na Santo Domingo y tambe e tabata buscando trabao.

ENTREGA SU MES NA SANTO DOMINGO

Hues a puntra A.F. con el a entrega su mes. A.F. a bisa cu el a check den registro di telefoon y a bay Cerca un abogado y a bis’e cu e kier entrega su mes. E abogado a yama Polis y Polis a bay detene A.F. na oficina di e abogado. A.F. a bisa cu el a laga un cellular, laptop y su pañanan na e Airbnb.

CON TANTA TABATA ABUSA DI ACUSADO

A.F. a bisa Hues cu su tanta tabata bis’e con e mester tene relacion cu un muher. Despues di dos siman, e tanta a bis’e pa bay den camber y kita su pañanan. Despues e tanta a tene relacion sexual cun’e. A.F. a bisa cu e tabata sinta malo. E tempo ey e tabatin 14 aña. El a bisa cu el a bisa su tanta cu e no ta sinti bon haciendo sex cun’e. Segun A.F., e tanta a bis’e cu ta su cas y cu A.F. mester haci loke e kier sino A.F. tin cu bay for di e cas. Esey a haci cu A.F. a keda tene relacion te cu su 16 aña y a para algun luna y despues e tanta a bolbe sigui. A.F. a bisa cu e tabata spaar placa pa e scapa di su tanta. Hues a bisa cu na Recherche A.F. a wordo interoga riba e abuso sexual. Nan a puntr’e con e tabata sinta ora cu tabatin relacion cu su tanta. El a bisa cu e tabata sinta rabia. Na Recherche el a bisa cu ora e nenga e tanta tabata grita y a bis’e cu si no sigui su regla e tin cu bay for di cas. Esaki tabata sosode un vez pa siman of cada pasa 2 siman.

DEMANDA DI DAÑO

Mr. Arendsz Marchena a bisa Hues cu e famia ta haci demanda riba e morto cruel di e tanta. E acusado ta yiu di un ruman muher di e victima. E tanta victima a cria A.F. E abogado a mustra cu e perdida di e tanta ta un sla duro pa famia. E famia a keda afecta y tin miedo di e acusado. E abogado a menciona suma di demandanan pero en total e ta suma 69 mil florin.

   Tambe e abogado ta demanda pa kita e derecho di herencia for di A.F. Ta asina cu e acusado ta e heredero di e cas y cosnan di e tanta victima. Famia ta desea mas pa ora condena A.F. declara tambe cu A.F. no tin derecho di herencia di e tanta. E abogado tambe e mustra cu e tanta tabata trahando un cas na Santo Domingo pa dentro di 2 aָña e bay bek y biba na Santo Domingo. El a demanda pa A.F. paga e gastonan cu falta ainda riba e cas, gastonan di entiero y Notario.

ACUSADO TIN PROBLEMA MENTAL

Hues a mustra cu tin raport di Reclassering, tin raport di psicologo y psychiater cu a papia cu A.F. For di e combersacionnan di e expertonan cu A.F. a sali na cla cu A.F. su tata a fayece jong. Cu su 12 aña, A.F. a bin Aruba y biba cerca su tanta. E no tin mucho amigo na Aruba. Na dado momento el a cuminsa traha. E tabata usa marihuana y alcohol. Reclassering ta haya fastioso pa duna conseho pasobra no a haya permiso pa bay papia cu otro hendenan. Hues a bisa cu segun raport di psicologo y psychiater, A.F. tin problema di personalidad y problema pa atende cu stress. Psychiater ta haya cu A.F. mester di tratamento promer cu A.F. por bolbe den comunidad. Hues a bisa cu e ta preocupa kico lo bay pasa cu A.F. ora e sali liber. Hues a mustra cu A.F. su famia a aleha di dje. A.F. a bisa Hues cu e ta bay cuminsa traha na un lugar cu ningun hende conoce. Psychiater ta haya cu A.F. tin indicacionnan di Autismo. Psychiater ta haya cu A.F. ta menos responsabel pa su actonan.

NO TA ASESINATO SINO MATA

Fiscal a bisa Hues cu ta trata aki di un caso hopi tristo caminda famia ta mata otro. Fiscal ta haya cu tin suficiente prueba legal cu A.F. a mata su tanta. Investigacion a mustra cu e victima tin 33 hinca na cabez, brazanan, pecho, lomba. Un di e hincanan a perfora su adder principal y pulmon. Esey a causa su morto. Fiscal a ripiti tur e pruebanan cu Hues a mustra contra A.F. Fiscal ta conclui cu 2 November 2025, A.F. a mata su tanta cu un cuchiu. A.F. a admiti esey.

   Fiscal a bisa cu e pregunta ta cu si aki ta trata asesinato of mata. Tur cos ta mustra cu A.F. lo tabatin un plan pero Fiscal ta haya cu no tin suficiente prueba. No a haya A.F. su cellular. Fiscal ta haya cu aki ta trata di un caso di mata intencional. El a bisa Hues cu mester declara A.F. liber di e acusacion di asesinato pasobra no tin plan. Na Santo Domingo a detene A.F. pero no por a haya cu cellular pa saca afor pruebanan.

FISCAL A EXIGI 15 AÑA DI PRISON

   Fiscal ta haya A.F. culpabel di a mata su tanta. E no ta haya cu por papia di un situacion di defensa propio. Fiscal ta haya cu un castigo pisa ta na su lugar.

   Pa cu e castigo, Fiscal  tene cuenta cu A.F. a haci su mes culpabel di kita bida di su tanta cu a adopt’e y dun’e su nomber. Door di esaki a causa hopi trista den famia na Santo Domingo. Fiscal a mustra cu A.F. a huur e cas, bende e auto, busca un adelanto serca doño di trabao di e tanta pa asina e huy bay Santo Dominigo. Fiscal a tene cuenta cu raportnan di psicologo y psychiater cu ta mustra cu A.F. ta menos responsabel pa su actonan. Fiscal ta haya fastioso pa tene cuenta cu raport di Reclassering pasobra no por duna castigo combina pa e tipo di delito serio aki. Fiscal ta haya cu no mester aplica e castigo hubenil. E ta haya cu mester considera A.F. como adulto. Fiscal a exigi 15 aña di prison pa A.F. Fiscal a pidi pa aproba varios di e demandanan di daño, pero no e cas bao construccion na Santo Domingo.

   Despues di a scucha defensa di abogadonan, Hues a cera tratamento di e caso y a bisa cu dia 4 December 2026 lo tin sentencia.