Gobierno no por laga pueblo paga e prijs di e crisis di Hospital

Evelyn Wever-Croes:

ORANJESTAD (AAN):  E situacion na Hospital Horacio Oduber (HOH) a bira alarmante. Ora personal di hospital ta sinti nan mes obliga pa protesta pasobra falta di solucion financiero ta afecta nan trabao y e continuidad di cuido, nos ta enfrenta un crisis cu gobierno no por sigui ignora.  Esey ta loke Evelyn Wever-Croes di MEP a indica.

   “Como lider di oposicion, mi ta profundamente preocupa cu Gobierno ta demonstra poco urgencia y responsabilidad pa proteha e sistema di salud di nos pais.”

   E problema financiero entre AZV y HOH no ta culpa di e pashent e persona cu ta depende di tratamento, e nurse, e dokter ni e otro profesional di salud cu ta dedica nan mes pa cuida nos comunidad.

   Nos pueblo no ta culpabel. Y no ta husto pa laga pueblo paga e prijs!  Salud no ta un luho ni un servicio cu por keda den incertidumbre financiero. Ta trata di bida humano, dignidad y e derecho di cada ciudadano pa haya cuido medico di calidad.

   Gobierno mester tuma responsabilidad y actua imediatamente. No mas adelanto temporal, no mas traspaso di problema di un presupuesto pa otro. Nos mester un solucion structural, transparente y sostenibel entre Gobierno, AZV y HOH.

   “Mi ta spera cu Gobierno pone e bienestar, e salud y e bida di nos ciudadano na prome luga. Un gobierno ta wordo midi no solamente pa su cifranan financiero, sino tambe pa con e ta cuida su pueblo.”

   Wever Croes a finaliza ta indcica cu pueblo di Aruba merece miho.