Prome Minister Mike Eman cu suplica pa Hotelnan grandi contribui mas na Carnaval

Apertura di temporada di Carnaval 73

ORANJESTAD (AAN): Diaranson tabata e fecha 11-11, y pa exactamente 11:11 am a habri oficialmente temporada di Carnaval 73.

   Durante e inauguracion di Carnaval 73 na Aruba Tourism Authority (ATA), Prome Minister Mike Eman a haci un suplica na e hotelnan grandi di Aruba pa contribui mas activamente na organizacion y desaroyo di nos Carnaval.

   Segun Eman, Carnaval no ta solamente un celebracion cultural, pero tambe un parti importante di e producto turistico cu Aruba ta ofrece na mundo. E ceremonia oficial a tuma luga riba 11 di november, caminda exactamente pa 11:11 di mainta a marca e inicio simbolico di temporada di Carnaval 73. E programa a conta cu participacion di presidente di Stichting Maneho di Aruba su Carnaval (SMAC), Rusette Croes, Prome Minister kende alavez ta Minister di Cultura Mike Eman y CEO di ATA, Ronella Croes.

   Durante su discurso, Prome Minister a felicita e directiva anterior di SMAC pa su dedicacion y trabao, y a duna bon bini na e directiva nobo bou di liderazgo di Rusette Croes. Tambe a expresa su aprecio pa e gruponan musical, organizadornan y tur esnan cu ta contribui na exito di Carnaval. Un punto importante den e discurso di Eman tabata su apelacion na e sector hotelero.

   Prome Minister a expresa cu, mientras ATA ta brinda sosten na Carnaval, e ta sinti falta di un contribucion mas grandi di parti di algun hotel grandi. Eman a dirigi un apelacion na CEO di ATA, Ronella Croes, pa acerca e hotelnan y splica nan e importancia di Carnaval pa Aruba. El a destaca cu e hospitalidad, energia y talento di pueblo Arubano ta forma parti di e experiencia turistico cu ta haci Aruba un destino special. Segun Prome Minister, e hotelnan grandi cu ta beneficia di e industria turistico tambe por desempeña un papel mas importante den sosten di Carnaval. Cu mas contribucion financiero, asina e organizadonan y gruponan lo por dispone di mas recurso pa sigui eleva e celebracion na un nivel ainda mas halto.

   Den su mensahe, Eman a destaca e creatividad, energia y dedicacion cu Carnaval ta representa. For di musica, baile y trahe te na organizacion di e caravananan, cada temporada ta demonstra e talento extraordinario cu Aruba tin, especialmente entre nos hobennan. Prome Minister a expresa cu e energia y dedicacion aki tambe por sirbi como inspiracion pa otro sector di nos sociedad, caminda Aruba por sigui traha pa mas prosperidad, bienestar y felicidad pa tur hende.

   Otro punto importante den su discurso tabata e deseo pa un Carnaval exitoso y pacifico. Eman a haci un apelacion pa tur participante celebra den un ambiente di trankilidad, respet y unidad, sin incidente ni polarisacion.

   "Ban sigui cu energia aki. Ban sigui cu entusiasmo aki", Prome Minister a expresa, animando tur esnan envolvi pa sigui fortalece Carnaval di Aruba.

   Durante e mainta tambe a tuma luga un momento di reconocimento na miembronan di e directiva anterior di SMAC pa nan contribucion na Carnaval. Cu e inicio oficial di Carnaval 73, Aruba ta prepara pa un otro temporada cu lo culmina cu e Parada Grandi dia 7 di februari 2027 den Oranjestad.

Prome Minister a cera su mensahe cu palabra di agradecimento na tur esnan cu ta dedica nan tempo y energia na Carnaval, expresando su deseo cu e temporada nobo lo ta uno exitoso, cu bendicion di Dios y cu un celebracion caminda pueblo di Aruba por sinti orguyo di su cultura y tradicion.