PPA ta pone presion riba Gobierno pa ataca e rais di costo di bida

Otmar Oduber:

*“Pueblo no ta sofoca solamente pa falta di ingreso, sino pa exceso di gasto” 

ORANJESTAD (AAN): Kico ta yuda un famia mas: un aumento di ingreso, of un reduccion permanente di e gastonan cu cada luna ta laga su cartera bashi? Pa lider di PPA, Otmar Oduber, Gobierno ta dedica demasiado atencion na cuanto ciudadano ta gana, mientras e problema di cuanto e mester paga pa biba, ta keda sin solucion structural.

BBO: un carga cu pueblo ta sinti diariamente

Oduber a cuestiona e efecto di BBO riba economia Arubiano. Segun Otmar Oduber, e sistema ta contribui na presion riba costo di haci negoshi y costo di bida, specialmente na un pais cu ta depende fuertemente di importacion. Oduber ta sostene cu Aruba mester evalua e alternativanan fiscal, cu por reduci e presion riba consumidor y empresa. “Nos no por sigui trata costo di bida sin cuestiona e carga fiscal cu ta influencia prijsnan,” el a enfatisa.

Transporte: centenares di florin cu ta desaparece tur luna

Oduber a menciona cu tin trahadornan cu ta gasta entre Afl. 300 y 450 mensualmente pa transporte. Pa un famia, esey por representa un parti significativo di su presupuesto.

Segun Oduber, inversion den transporte publico eficiente y accesibel, por reduci directamente e gasto aki. “Reducigasto di transporte ta laga mas placa den man di pueblo, tur luna.”

Vivienda: hasta mantene un casta birando un luho

Oduber a identifica vivienda como un di e factornan mas importante den costo di bida.

Material di construccion, reparacion y mantencion ta representa e gastonan cu hopi famia ta lucha pa cubri. E ta cuestiona si maneho economico di Gobierno ta tene suficiente cuenta cu e presion aki, cu ta afecta tanto e propietarionan como esnan cu ta buscando un vivienda accesibel.

Gobierno mester baha e cuenta mensual di pueblo

Pa Oduber, e solucion no porta limita na un medida salarial.Gobierno mester aborda simultaneamente e carga fiscal, transporte y vivienda, pa asina e alivio economico realmente yega den cas di nos ciudadanonan. Segun Oduber: “No ta suficiente pa pueblo haya mas placa, si Gobierno no ta haci nada pa e placa ey dura mas largo.”

P’esey mes e berdadero reto politico no ta solamente aumenta ingreso. Sino pa haci Aruba un pais, caminda trahamento honesto ta suficiente pa por biba dignamente.