Oficialnan di Mobiele Eenheid riba caya a detene 3 hende y confisca droga y arma blanco

Den weekend cu a pasa

ORANJESTAD (AAN): Diabierna y diasabra durante listramento preventivo unidad di ME tabata activo controlando di skina pa skina.

   Vocero di Polis a confirma na DIARIO, cu Mobiele Eenheid a listra un total di 65 hende y a controla den 12 auto.

   Durante e controlnan a haci tres detencion. E detencionnan tabata pa entre otro; posesion di arma blanco, posesion di droga y pa maltrato cu un arma blanco.

   Tambe unidad di Mobiele Eenheid a confisca bastante arma blanco manera cuchiu, skinopps (boksbeugel), cantidad di droga y un donderboos profesional.  Tambe a confisca hopi atributo pa cu uzo di droga.

   Hendenan canando cu tur sorto di artefacto raro den nan poder riba caya.

   Cuerpo Policial Aruba ta keda recorda comunidad cu sa algo of a wak algo yama e tipline di polis na 111-41.  Bo ta keda 100% anonimo.