San Nicolas Pop-Up Market ta expande na mas di 90 bendedor

Riba Diasabra lo tin atrobe

ORANJESTAD (AAN): San Nicolas Pop-Up Market ta drenta un fase nobo di crecemento y expansion. Despues di celebra su prome aniversario exitosamente na september, e iniciativa cu ta wordo sosteni door di Minister di Finansa, Asunto Economico y Sector Primario, Geoffrey Wever, ta sigui crece y ta prepara pa su edicion mas grandi te awor, cu mas di 90 vendor local.

   Diasabra 31 di October, for di 9’or di mainta te 2’or di atardi, centro di San Nicolas lo transforma un biaha mas den un mercado yen di comercio, gastronomia, cultura y entretenemento pa henter famia.

   Loke a cuminsa na september 2025 cu solamente 13 vendor, den poco mas di un aña a desaroya pa bira e mercado local mas grandi di Aruba. E crecemento constante ta refleha e confianza di comerciantenan, artesanonan y productornan local den e iniciativa, pero tambe e apoyo di comunidad y e cantidad creciente di bishitante cu cada luna ta yega San Nicolas.

   Desde principio, e vision di Minister Wever tabata pa crea algo mas cu un mercado mensual. E meta tabata pa establece un plataforma accesibel y continuo unda negoshinan chikito, artesanonan y productornan local por presenta nan producto, amplia nan clientela y genera mas actividad economico. Pa logra esaki, Ministerio di Finansa, Asunto Economico y Sector Primario a sigui inverti cada luna den organizacion y desaroyo di e Pop-Up Market, creando e condicionnan pa e iniciativa por crece.

   E siguiente edicion ta marca un paso importante den e desaroyo aki. Pa acomoda e cantidad creciente di vendor y bishitante, e mercado lo expande for di Plaza Lolita pa inclui e terreno situa entre edificio di RDA y e futuro edificio di MFA. E espacio adicional lo conta cu tentnan, mas sombra, mesa y stoel, creando un ambiente mas comodo unda bishitantenan por sinta, come, relaha y disfruta di e actividadnan hunto cu famia y amigonan.

   Minister Wever ta considera e expansion como un resultado concreto di e vision pa fortalece comercio local y trece mas bida den centro di San Nicolas.

   “Un aña pasa nos a cuminsa cu 13 vendor y un vision cla, pa crea mas oportunidad pa nos comerciantenan local y trece mas actividad economico den San Nicolas. Awe nos ta pasa 90 vendors y nos ta expande e mercado pa acomoda e crecemento. Esaki ta demostra e potencial grandi cu San Nicolas tin. Ora Gobierno crea e condicionnan y comunidad responde cu confianza y participacion, nos por logra resultado concreto. Nos compromiso ta pa sigui inverti den e iniciativa y hacie cada biaha mas grandi y mihor,” Minister Wever a expresa.

   E edicion di 31 di October lo ofrece un variedad amplio di producto local, incluyendo berdura, fruta, webo y carni fresco, arte, artesania y diferente producto traha localmente. Bishitantenan por disfruta tambe di un oferta extenso di gastronomia, cu cuminda Crioyo, Barbecue, roti, oxtail, cabrito, sopi, johnny cake, snacks, juice natural, awa di coco, bolo y otro cos dushi.

   Pa completa e ambiente, Touch of Steel y DJ Bang Daddy lo percura pa entretenemento musical, mientras cu e muchanan por disfruta di Dino Jump completamente gratis.

   Un atraccion special di e edicion aki ta e prome San Nicolas Pop-Up Market Domino Knockout  (Torneo di Pareha), cu lo tuma lugar di 10or di mainta te 2or di atardi na Plaza Lolita. E torneo ta ofrece participacion gratis y diferente premionan pa e parehanan ganador. Inscripcion ta via Anthony Trimon na 593-7525. E torneo ta conta cu apoyo di Toyota Aruba y Balashi.

   Un otro adicion special ta participacion di Toyota Aruba, cu lo exhibi su modelonan nobo di auto durante e mercado. E Sales Team di Toyota lo ta presente pa ofrece informacion, contesta pregunta y hasta prepara oferta directamente pa bishitantenan interesa. Ministerio ta aprecia e participacion di Toyota Aruba y e apoyo di Balashi, cu ta contribui na e variedad di actividad y experiencia cu e mercado ta ofrece.

   Banda di e expansion fisico y e programa di entretenimento, San Nicolas Pop-Up Market ta cumpli cu un funcion importante den e desaroyo economico y social di San Nicolas. Cada edicion ta atrae bishitante for di diferente parti di Aruba, ta stimula consumo local y ta crea oportunidad pa comerciantenan chikito presenta nan producto directamente na consumidor. Na mes momento, e mercado ta fortalece e conexion entre comunidad, comercio y cultura, convirtiendo centro di San Nicolas den un punto di encuentro activo.

   E desaroyo aki ta alinea cu e prioridadnan di Programa di Gobernacion AVP-Futuro 2025–2028, particularmente e vision pa stimula desaroyo economico, fortalece comercio local y contribui na revitalisacion di San Nicolas. E iniciativa ta demostra cu revitalisacion no ta limita solamente na inversion den edificio y infrastructura, sino cu ta importante tambe pa crea actividad economico, atrae bishitante y genera oportunidad pa comunidad.

   Minister Wever ta enfatisa cu e crecemento di e mercado no lo tabata posibel sin e confianza y compromiso di e comerciantenan, artesanonan, productornan y bishitantenan cu cada luna ta sostene e iniciativa.

   “E exito di San Nicolas Pop-Up Market ta pertenece na tur e comerciantenan, artesanonan y productornan cu a kere den e iniciativa desde principio, y na e comunidad cu cada luna ta yega pa sostene nan. Nos ta sumamente agradeci pa e confianza aki. E crecemento na mas di 90 vendor ta un motivacion pa nos sigui desaroya e mercado, crea mas oportunidad y haci San Nicolas un centro comercial cada biaha mas activo y atractivo.”

   Cu e expansion aki, Ministerio di Finansa, Asunto Economico y Sector Primario ta reafirma su compromiso pa sigui fortalece San Nicolas Pop-Up Market como un plataforma permanente di oportunidad pa comercio local y como un contribucion concreto na revitalisacion economico y social di San Nicolas.