Diadomingo awo Opendag di Brandweer ta bek despues di siete aña

Francis Toussaint di Brandweer:

• Fire Prevention Week dedica na memoria di Pedro Croes 

ORANJESTAD (AAN): Despues di siete aña, Cuerpo di Bombero Aruba, cu e vision di comandante Jair Tromp, ta organiza su famoso Brandweer Opendag. Diadomingo, 4 di oktober 2026, Post di Brandweer Tango na Tanki Flip lo habri su portanan pa publico di 10 or di mainta te 4 or di atardi. E evento ta parti di algun evento cu lo tuma luga den conexion cu Fire Prevention Week.

   E regreso di e evento ta ofrece comunidad un oportunidad pa conoce di cerca e trabao di bomberonan. E invitacion ta dirigi na henter famia, cu atencion special pa muchanan di Aruba.

   E aña aki, segun relacionista publico Francis Toussaint, Fire Prevention Week ta dedica na memoria di colega, den feliz memoria, Pedro Croes. Cu e dedicacion aki, Brandweer ta honra su compromiso cu educacion di comunidad y muchanan riba prevencion di candela y siguridad.

   Segun Toussaint, Post Tango lo transforma den un “mini Disney World” durante e dia, cu un variedad di actividadnan y premionan pa muchanan disfruta.

   Durante e Opendag, bishitantenan lo por conoce diferente vehiculo y ekipo di Brandweer, entre nan e autospuit, hulpverleningwagen, ladderwagen y tankwagen. Muchanan lo haya oportunidad di subi den e trucknan, mientras demostracionnan en bibo lo mustra con pa paga candela y con pa preveni situacionnan di peligro.

   E programa ta combina educacion cu entretenimento. Lo tin actividadnan cu awa, pintamento di cara y oportunidad pa saka potret cu Marshall di Paw Patrol.

  Pa Adultonan tambe tin un programa hinca den otro. Lo tin un booth cu informacion y conscientisacion riba prevencion di candela y detector di huma, cu ta e tema prinicipal di Fire Prevention Week di e aña aki.

  Ademas, lo tin un snacktruck y un bar bon surti. Aunke entrada ta gratis, organizadornan ta recomenda publico pa bin cu cash.

   Cu e evento aki, Cuerpo di Bombero Aruba ta invita comunidad pa pasa un dia hunto, siña mas di siguridad y honra memoria di Pedro Croes, continuando cu e labor educativo cu e tabata dedica su mes na dje.