Bernhardstraat ta prepara pa haya iluminacion di Pasco

Como parti di revitalisacion di San Nicolas

ORANJESTAD (AAN): Den cuadro di e esfuerso continuo pa revitalisa San Nicolas, Prome Minister Mike Eman a bishita Bernhardstraat, unda tecniconan di N.V. Elmar a cuminsa cu e preparacionnan necesario pa instala iluminacion di Pasco den e area.

   E trabao ta forma parti di e proyecto di revitalisacion di Bernhardstraat, cu pa casi seis luna caba ta conta cu participacion di boluntarionan cu tur diasabra ta pone man na obra pa verf y drecha casnan den e caya. Segun Prome Minister Eman, e iniciativa no ta solamente un proyecto di Gobierno, pero un esfuerso di e propio ciudadanonan di San Nicolas, cu apoyo di boluntarionan for di diferente parti di Aruba.

   Durante e bishita, Prome Minister Eman a indica cu Gobierno a haci un suplica na DOW y N.V. Elmar pa San Nicolas por ta entre e prome areanan cu ta haya decoracion y iluminacion di Pasco e aña aki. Esaki ta den liña cu e atencion cu Gobierno ta duna na revitalisacion di bario y centro di ciudad.

   E intencion ta pa e iluminacion contribui na e ambiente, optimismo y alegria den e barrio durante temporada di Pasco, mientras cu e trabaonan di revitalisacion ta sigui su curso.

   Haime Vingal, coordinador di Ministerio di Asunto General, a splica cu N.V. Elmar ta encarga cu e prome fase tecnico di e trabao. Esaki ta inclui adaptacion di palonan di luz y instalacion di e material electrico necesario. Despues cu Elmar termina su parti, DOW lo sigui cu conexion di e decoracionnan y fotocel, pa e luznan por sende automaticamente.

   Segun Vingal, e trabaonan tecnico lo por keda cla den algun dia. E meta ta pa dia 14 di october tin un momento special den area di Bernhardstraat, cerca di Chocolate City, pa sende e iluminacion di Pasco oficialmente hunto cu comunidad.

Prome Minister Eman a resalta cu e iniciativa na Bernhardstraat ta mucho mas cu solamente decoracion di Pasco. E ta forma parti di un esfuerso mas amplio pa trece bida y actividad bek den bario y pa reenforsa e sentimento di comunidad.

   E proyecto di Bernhardstraat ta un di varios proyecto cu ta andando na San Nicolas. Entre otro, Gobierno tin proyectonan pa un MFA na San Nicolas, renovacion di diferente area den centro di ciudad, asfaltamento di diferente caya y otro inversionnan den infrastructura.

   Prome Minister Eman a indica cu e esfuerso pa revitalisa bario no ta limita na centro di Oranjestad. San Nicolas tambe tin un luga importante den e proyectonan cu ta den desaroyo pa duna e ciudad y su barionan un impulso nobo.

   Bernhardstraat ta un ehempel di con Gobierno, empresanan publico y comunidad por pone hunto man na obra. Cu boluntarionan cu tur diasabra ta sigui verf casnan y cu awor e instalacion di iluminacion di Pasco, e caya ta sigui cambia paso pa paso.

   E iluminacion ta agrega un elemento nobo na e revitalisacion di Bernhardstraat, cu e meta di trece mas alegria, optimismo y un ambiente di Pasco den corason di San Nicolas.