Mercado informal cu no ta paga impuesto ta creciendo te na e punto di ta birando absurdo

Segun Presidente Frans Ponson CUA:

• Falta di control ta ocasiona frustracion 

ORANJESTAD (AAN): Frans Ponson, presidente di Comerciantenan Uni Aruba (CUA), den un rueda di prensa recien, a expresa preocupacion serio tocante e crecimiento di mercado informal na Aruba y e competencia desigual cu comerciantenan registra ta enfrentando diariamente. Segun Ponson, e mercado aki cu no ta paga impuesto, ta creciendo te na e punto di ta birando absurdo.

   Segun Ponson, un comerciante formal mester cumpli cu registracion, paga impuesto manera BBO, mantene su administracion na ordo y carga diferente gasto operacional. Na mes momento, tin persona y negoshinan cu ta ofrece e mesun servicio sin ta registra ni ta cumpli cu e mesun obligacionnan.

   Ponson a indica cu ta dificil pa duna un contesta na miembronan di CUA, cu si ta cumpli cu tur regla, y cu ta acerc’e constantemente y hopi biaha ta puntra con un comerciante cu ta cumpli cu tur regla por competi cu hendenan den e mesun sector cu no ta registra, no ta paga impuesto/BBO y no tin e mesun gastonan.

   El a indica cu miembronan ta wordo poni den un posicion pa tuma decisionnan, sea nan ta cera nan negoshi pa motibo cu clientenan ta haya cu nan prijsnan ta mucho caro y cerca competencia, cu no ta registra, nan ta haya prijs mas barata. Of, Ponson ta cuestiona, lo nan mester tuma e decision pa haci mescos cu nan competencia y bay ilegal?

   Pa esaki, Comerciante Uni no ta para. Pero segun Ponson, ta yega un punto na unda cu mester bin cu un solucion riba e topico aki, hunto cu Gobierno di Aruba pa evita cu e situacionnan ilegal aki sigui crece.

   Ponson ta indica cu e situacion no solamente ta perhudica e comerciante formal, sino tambe ta afecta entrada di Gobierno y ta crea un sistema den cual falta di cumplimento aparentemente no tin consecuencia.

   Segun Ponson, diferente miembro di CUA, cu ta hopi rabia, a entrega keho y informacion tocante actividadnan informal na Departamento di Impuesto y di Asuntonan Economico, pero nan no ta mira accion concreto of nada ta pasa. E falta di control ta causa frustracion y ta pone mas presion riba empresario cu ta trata di opera legalmente.

   CUA ta haci un yamada na Gobierno pa establece un sistema di control y maneho permanente, y aplica e leynan existente na un manera igual pa tur hende. Comerciantenan no ta pidi privilegio. Nan ta pidi un tereno di competencia husto, caminda tur hende cu ta haci negoshi mester cumpli cu e mesun regla.