Aña Escolar nobo na Colegio Santa Filomena a inclui un hardin nobo di wega

ORANJESTAD (AAN): Riba Diahuebs mainta, por a mira caranan contento di muchanan yegando na e scol basico Colegio Santa Filomena na San Nicolas. 

Aña escolar 2026-2027 a cuminza cu aventuranan nobo, cu oportunidadnan unico, amistadnan nobo, y memorianan cu lo bay dura.

   Tabata un chens tambe pa oficialmente habri nan Hardin nobo di Wega.  Pastoor tabata presente pa asina bendiciona e Hardin aki pa su bon uso.  E playground aki a bira posibel danki na ‘Wings of Hope’ den colaboracion cu ‘ABO Projects’.  Esnan di Colegio Santa Filomena ta hopi agradecido pa nan sosten, dedicacion, y compromiso pa e muchanan, pues danki pa a haci e soño aki bira realidad.

   E mainta aki tambe nan a duna bon bini na un docente nobo, esta Sagine.  Nan ta contento cu e ta forma parti di e scol.  Pa nan tur, deseonan di exitoso aña escolar nobo.  E potretnan aki pa cortesia di Colegio Santa Filomena.