Ministro Herdé ta duna Comerciantenan Uni tur razon pa e critica

DOW y varios departamento ta hayando upgrading pa nan sistema

 *Pa fin di aña un sistema full nobo lo ta operacional 

ORANJESTAD (AAN): Ministro di Obranan Publico, Rene Herdé a tuma nota di e reclamo di Comerciantenan Uni di Aruba, relaciona cu tardanza enorme y hasta cu no ta dunando permiso di construccion.

   “Nos ta den un proceso di reorganizacion di e Departamentonan,” Ministro Herdé a indica.   E ta haya cu e ta duna esnan cu a critica e tardanza, full full nan razon.  “No tin ningun excusa, y ta increibel cu hende tin cu warda 6 luna of mas pa un mapa di construccion.”

   Ministro a agrega aun, cu hasta entre e Departamentonan falta comunicacion. Paso ora bo ta construi un cas, bo a haya un pida tereno, bo mester di diferente permiso. Aworaki nan ta manera ‘los fo’i otro’.  Tin biaha bo ta haya un, bo ta haya otro, tin biaha bo ta haya tur dos, e no ta eficiente, e no ta bon.

   “Mi no ta critica e departamento nan, pasobra esaki ta e consecuencia di negligencia añanan largo. Tin Departamento cu ta trahando cu mita di e personal cu nan lo mester tin. Nan no tin computer drechi, nan sistema nan ta anticua, e procedimentonan ta anticua. Tin hende ey den di berdad cu no mester ta ey den, y esey tambe tin”.

   Ministro a sigui bisa: “Kiermen cu e resultado di e negligencia aki, nos ta mire no di awor, pero pa añanan caba. Pero mi por compronde cu e inversionista- y comerciantenan ta bisa cu awor mi a fada.  Awor gobierno nobo a drenta y ainda e no a drecha.  Mi ta duna nan te eynan full razon.”

   El a agrega cu Gobierno cuminsando e aña aki cu un compania grandi cu ta bay yuda reorganiza tur tres Departamento, esta BID, DLV, cu DOW pa traha un di dje y cu un procedimento nobo, cu sistemanan nobo, cu software nobo, y nan lo haya training, transparencia, loke por a mira loke a haci caba na DIP ta apenas e comienso.

   Na DLV encarga cu Dienst Landmeetkunde, e ta un lugar cu e mester a socede caba, y muy pronto Notarionan mes enbes di bay para den rij pa entrega of busca nan papelnan, nan ta haci’e online.  Clientenan tambe lo por bay haci procesonan, incluyendo pagonan online.  Nos tin e tecnologia, no tin nada pakico e no a wordo aplica den pasado.  No ta awor el a wordo inventa, sino pa hopi aña caba e tey.  Awor cu nos ta implemente, Ministro su speranza ta cu pa fin di aña pa lo mester por mira cambionan significante.

   “Cuminsando cu esun di vergunnning.  Pasobra esun di vergunning a manda busca un experto cu a haci exactamente e mesun trabao aki na Corsou y Bonaire y na otro camindanan.  El a bin apenas dos biaha na bin Aruba, pues no ta permanente, sinembargo e resultado- y reaccionnan cu e ta haya di Departamento, ta cu nan ta haye tremendo, y cu mester a trece e experto aki di hopi tempo caba,” Ministro a bisa.

   El a indica cu pa fin di aña, e bottleneck cu tin mas di un decada cu ta critica y keha riba dje, lo bay wordo elimina.  “Ami ora mi topa un arkitecto, hende den construccion... ta berguensa cu cada biaha atrobe bo tende esey.  E cifranan cu a mi a tende ta cu como 6 luna of mas e ta dura pa haya un permiso di construccion. Mi no ta critica e departamento, nan falta hende, nan falta sistema, nan falta computer, tin biaha falta un tiki motivacion paso pa tur loke a pasa. Pero nos no ta bay sigui, nos no por, nos no ta bay sigui, ta inaceptabel.”

   El a sigui bisando: “Mi ta duna CUA y otro nan cu ta critica full razon di critica. Nos mester a critica hopi hopi mas trempan. Por ultimo, e critica tambe aworaki mi ta accept’e pero djis pa nan sa nos ta cuminsa caba.”

   Que hubo di ora hende manda un email y hamas ta ricibi contesta?  Ministro a indica cu e sistemanan nobo, e computernan mes ta genera y manda contesta, pues no mester busca hende pa yuda den esey.  Pues unabes tur cos ta cla, tur hende lo cuminza ricibi contesta.