Aña pasa no tabatin ningun pelea ni paden y tampoco pafo di EPB Oranjestad na Hato

Director Erwin Lopez ta satisfecho

• Tur problema na scol di EPB Hato a bira menos
• Tin dos trahador social y sicologo ta yudando 

ORANJESTAD (AAN): Tur hende por corda con den temponan recien, cada rato ta tende di problemanan severo cu ta socede tanto pafo como tambe paden di tereno di EPB Oranjestad situa na Hato.

   Pelea di hobennan paki-paya, pelea di hobennan contra Security Guard, problema di mayornan pafo cu ta defende nan yiunan.

   Con el a bira awor?  Den un entrevista recien cu DIARIO, e director Erwin Lopez a confirma cu toch nan problemanan social tey, sinembargo awor den ultimo añanan e no ta manifesta su mes fo’i control mas.  Segun Lopez, na EPB Hato nan tin awor dos trahador social, y tambe un sicologo cu na su opinion ta haciendo bon trabao pa yuda e alumnonan.  Directorado di EPB Oranjestad a agrega cu nan sa si cu e problema di finanzas di mayornan ta hunga un rol.

   Aki Lopez a agrega, cu nan tin un Fundacion na scol, unda mensualmente tur docente ta haci donacion di parti di nan salario, y di e forma ey nan ta trata di yuda cierto studiantenan lo mas hopi posibel.

   Problemanan ta menos: Algo cu director Erwin Lopez a trece dilanti y cu a acapara atencion di DIARIO, ta e hecho cu ultimo añanan problemanan den cura di scol na Hato a baha drasticamente.

   “Nos casi nos no tin hopi pelea mas,” el a declara.  El a agrega cu den aña escolar di 2025-2026 dilanti tereno di scol mes, a bira hopi mas keto compara cu e aña prome.   “Pa mi, nos ta bayendo den un bon caminda,” Lopez a splica.

   Hopi biaha ta tende e storia cu hopi mayor no tin placa pa paga Schoolgeld pa nan yiu, uniform, computer, etc.

   Riba e pregunta aki, director Erwin Lopez a splica cu awor EPB Oranjestad ta completamente full digitalisa, esey nifica cu pa bo haya les eynan, e alumno ta obliga di tin un Computer, pues nan mester di un Laptop Computer.  Awendia e Laptop mas barata ta costa promedio di 575 pa 600 Florin, y e alumno lo haci uzo di dje pa como 4 aña.

   Un fondo pa yuda: “Nos ta avisa tur mayornan hopi di antemano, cu si nan kier sigui les na EPB Oranjestad, cu esey ta un rekesito importante.  Pues si bo no tin Laptop Computer, bo no por sigui les. E scol ya no tin buki mas, pasobra tur cos ta digitaliza.

   E momento ey, si acaso tin un mayor cu no tin placa pa cumpra uno, nan tin e Fondo Social na scol cu eventualmente lo por yuda pero e ta un proceso. Bo no ta yega haya prome dia di scol si. No ta asina cu EPB Oranjestad tin computer den stock pa facilmente yega y duna muchanan na scol. E tin di bay via proceso pa logra obtene uno.

   Tin di corda cu den klasnan na EPB Oranjestad no tin computer, pues ta e alumno tin di bin cu e Laptop di dje pa por sigui les.  Tambe bo mester tin Wi-Fi na cas, pasobra si bo tin djis bo computer sin Wi-Fi na cas, e ta un problema.

   Lopez a indica cu esnan cu tin problema pa paga Schoolgeld, nan tin un areglo di pago.  E muchanan cu drenta prome aña, tin cu paga na Schoolgeld si, sinembargo alumnonan existente cu ya ta na scol, pa nan tin areglo di pago disponibel, y nan tin 12 luna di tempo pa pag’e.

   Toch bo por haci peticion na e Fondo Social di e Docentenan pa nan yuda paga. Hopi mucha ta aplica, varios di nan ta wordo yuda, hasta computer nan a yuda cumpra pa muchanan.  EPB Oranjestad tin tambe sosten di comercio cu aki-aya ta haya donacionnan cu ta yuda paga e diferencia di e loke e alumnonan debe.