Mester di mas claridad y miho comunicacion tocante e test preventivo pa cancer di tripa grandi y e cobertura di AZV

Parlamentario Dennerich Kelly di AVP:

ORANJESTAD (AAN): Parlamentario di AVP y enfermero di profesion, Dennerich Kelly, ta haci un yamada pa mas claridad y miho comunicacion tocante e discusion actual riba test preventivo pa cancer di tripa grandi y e cobertura di AZV. Segun Kelly, e preocupacion cu hopi ciudadano a expresa ta legitimo y merece un splicacion completo y honesto.

“Ora un persona a contribui na AZV durante hopi aña y di un momento pa otro ta lesa cu un test no ta wordo cubri automaticamente, ta normal cu e ta haci pregunta al respecto. Esakinan no ta preguntanan straño; nan ta preguntanan digno cu merece un contesta cu ta crea comprension,” Kelly a declara.

Basa riba su experiencia como enfermero, Kelly a splica cu bon cuido di salud no kiermen cu tur persona mester ricibi e mesun investigacion of tratamento. Cuido di calidad ta enfoca riba e necesidad individual di cada pashent, considerando, entre otro, su estado general di salud, otro condicionnan medico, e beneficio cu un test por brinda y tambe e posibel riesgonan.

“Un dokter no ta mira solamente e edad di un pashent; e ta mira e persona den su totalidad. E pregunta principal semper mester ta: ‘E test aki lo beneficia e pashent realmente?’”

Kelly a expresa tambe su reconocemento profundo na tur profesional den sector di cuido di salud, incluyendo enfermero, dokter, specialista, personal di ambulans, boticario y otro profesionalnan cu tur dia ta carga cu e responsabilidad di tuma decisionnan compleho basa riba evidencia cientifico y e bienestar di nan pashentnan.

Segun e parlamentario, na hopi paisnan e screening preventivo pa cancer di tripa grandi normalmente ta para rond di 75 aña, pasobra investigacion cientifico a mustra cu despues di cierto edad e beneficio generalmente ta bira mas limita mientras cu e riesgo di complicacion por aumenta. Sin embargo, Kelly enfatisa cu esaki no ta un regla absoluto.

“Si un persona di 78 of 80 aña ta goza di bon salud y e medico ta considera cu e investigacion lo aporta un beneficio real, e investigacion por wordo indica y efectua. No ta solamente e edad cu ta determina e decision; ta e situacion completo di e persona.”

Despues di dialogo cu profesionalnan di salud y cu e Minister di Salud Publico, Kelly a indica cu e decisionnan medico no ta wordo tuma arbitrariamente, sino riba evidencia cientifico internacional, protocolnan medico y e responsabilidad di garantisa cuido di calidad pa tur ciudadano. Esaki, segun dje, no ta elimina e derecho di pueblo di haci pregunta, pero si ta resalta e importancia di duna e contexto completo.

“Talbes e les mas importante cu nos por saca for di e discusion aki ta cu bon cuido di salud no ta depende solamente di bon hospital, bon dokter of un bon seguro; bon cuido ta depende tambe di bon comunicacion. Ora cu tin falta di splicacion, inseguridad ta nace; y hopi biaha ta converti den desconfiansa. Confiansa semper lo ta e base di un bon relacion entre pashent y profesional medico.”

Kelly a conclui cu nos adultonan mayor, cu a contribui durante nan bida na construccion di Aruba y na sistema di AZV, merece no solamente cuido di calidad, sino tambe respet, claridad y informacion cu nan por comprende.

“Como miembro di Parlamento lo mi sigui traha pa un sistema di salud cu ta fuerte den calidad y tambe transparente y comprondibel pa nos pueblo. Bon cuido no ta cuminsa cu un protocol of un test. Bon cuido ta cuminsa ora un persona ta compronde pakico un decision a wordo tuma. Unda comprension ta crece, confianza ta crece; y unda confianza ta crece, nos pueblo por sigui construi riba speranza, respet y union,” Kelly a conclui.