ORANJESTAD (AAN): Rond 6:19 di anochi, Central di Polis a recibi un yamada relaciona cu un auto sospechoso cu tabata circula na altura di Dyon Center na Madiki.
Segun e informacion recibi, tabatin sospecha cu personanan den e vehiculo por tabatin un arma di candela.
Un unidad policial a wordo manda inmediatamente pa e area y a identifica e auto. Ora polis a duna señal pa e vehiculo para, e chauffeur a acelera, y esaki a resulta den un persecucion policial.
E persecucion a termina na altura di River Plate, unda polis a logra detene e auto. Den e vehiculo tabata tin cinco persona: tres menor di edad y dos adulto, tur di sexo masculino.
Durante e inspeccion di e auto, polis a haya y confisca droga. Ademas, a inicia un buskeda den e area pa localisa e arma di candela, cu segun e informacion disponible por a wordo benta banda di e veld di River Plate.
Tur cinco persona a wordo deteni y e auto a wordo confisca como parti di e investigacion. E caso awo ta den mannan di Recherche. Cuerpo Policial ta pidi si cualkier persona sa algo of a wak algo pa yama tiplijn di polis na 11141. Bo ta keda anonimo.
Related News
Invitacion di Parokia Santa Anna pa comienso di celebracion di 250 aña di existencia
OM ta reacciona riba conferencia di prensa den caso di accidente mortal di trafico
Asina lo celebra Dia Independencia di Colombia cu e patruyero ‘ARC 24 de Julio’
