Asina lo celebra Dia Independencia di Colombia cu e patruyero ‘ARC 24 de Julio’

Consul Gustavo Serrano Amaya:

ORANJESTAD (AAN) Consul General di Colombia na Aruba, señor Gustavo Serrano Amaya, den entrevista cu Matutino DIARIO, a referi na e agenda cu tin prepara, pa celebra Diadomingo proximo, 19 di Juli, e Independencia di Republica di Colombia,  coincidiendo cu e presencia di e boto patruyero “ARC 24 de Julio” den waf di Oranjestad.

   E acto ta cuminza cu tocamento di e Himno Nacional di Colombia, sigui pa hisamento di e bandera, lo tin discurso di Prome Minister di Aruba, tambe di e Presidente di Parlamento, ademas e Consul lo hiba palabra, pa despues diferente actividad di tipo cultural, manera algun baile, declamacion di poema, y canto.

   E parti cultural aki lo tuma lugar na final di e evento, na banda di e patruyero mara na e waf turistico.

   Consul Serrano Amaya a haci un invitacion particularmente na e residentenan Colombiano na Aruba, y igualmente na henter pueblo Arubiano di e diferente nacionalidadnan radica na Aruba. For di 11’or di mainta e personanan por ingresa pa bishita e patruyero y e bishitanan lo ta cu guia unda lo splica e diferente caracteristica y structura di e boto “ARC 24 de Julio”.