Auto coriendo duro y den direccion contrario a plama den tres vehiculo UTV

Accident grave Diadomingo mainta na Piedra Plat

ORANJESTAD (AAN): Diadomingo den oranan di mainta, comunidad den area di Paradera y Santa Cruz a tende monton di sirena.  Dos unidad di Ambulans, como tambe Polis, y unidadnan di Cuerpo di Bombero mobilizando.

   Nan tabata rumbo pa e cruzada T-weg conoci pa hopi hende como ‘cruzada di Weng Kee’ net pariba di e brug di Piedra Plat, pa un accident basta serio, cu hende herida.

   Yamadanan a keda drenta tras di otro, y esey a pone cu ta diferente unidad di Polis a mobiliza pa eynan.  Na yegada, e prome patruya a bin topa cu un accident den cual tin 3 vehiculo tipo UTV kibra, y poco mas pabao un Kia Rio hatchback color scur cu number A-11094 kibra banda pazuid di caminda.  Den e vehiculonan UTV tabatin turista kendenan tabata bayendo pa un Offroad Tour.

   Turista a keda pega: Tabatin un turista femenino cu a keda herida y no por a sali for di e UTV.  Pa colmo den e choque, un wiel a los bula y a bay dal e turista tambe.  Pesey a rekeri presencia di Vehiculo di Rescate di Cuerpo di Bombero.

   Polis a papia cu testigonan, y nan a splica cu e vehiculonan UTV ta bayendo direccion pariba, coriendo tras di otro y nan a caba di cruza e brug di Piedra Plat.  Diripiente nan a nota e auto sedan Kia Rio hatchback ta bayendo direccion pabao, y ta coriendo full na su banda robez di caminda.  Mirando loke ta biniendo riba nan frontalmente, esnan den e UTV casi no por a ni reacciona.   E Tour Guide coriendo mas dilanto a logra hala na tempo, sinembargo e otronan no por a hala.  Pesey tres a ricibi daño material extenso.

   E Kia Rio pues a dal frontal den e prome UTV, y asina a sigui bay raspando algun di e otronan cu tabata den caravana, y ta termina basta meter mas pabao.

   Ora cu Bomberonan a yega, a resulta cu hendenan eybanda mes a yuda pa logra saca e turista femenino cu tabata pega.  Dos unidad di Ambulans a yega, y e Paramediconan di ImSan a check e tres personanan herida, y a opta pa bay cu nan rumbo pa Hospital.

   Bomberonan a yuda pa stabiliza e vehiculonan pa asina nan no logra move inespera mas.

   Chauffeur di e Kia: Testigonan a splica cu e chauffeur di e Kia Rio tabata mustra di ta bao influencia di alcohol asina trempan riba Diadomingo mainta alrededor di 9:00 am.  Coriendo full na su banda robez y cu trot den bom.

   Sinembargo no a mira Polis haci AlcoSensor test cu ne pa supla, y kizas esaki ta debi cu e tambe a keda herida, of si acaso el a bira malo prome cu e accident y pesey a bay core na su banda robez.  Esaki ta wordo aclara den e rapport final cu Polis di Trafico lo produci.  Chauffeur di e Kia Rio tambe a wordo transporta cu Ambulans pa Hospital.

   E accident a laga e demas turistanan den shock pa loke nan a caba di pasa aden durante nan tour di One Happy Island.  Pesey a manda busca Bureau Slachtofferhulp pa duna un man.  Tambe a notifica un funcionario di Departamento di Transporte Publico pa bay eynan pa check e accident.