Falta di personal ta trece hopi presion den sector publico y politizacion ta crea escepticismo

Magaly Brito, Secretario General di SEPPA:

ORANJESTAD (AAN)- Encuanto e preocupacion cu miembronan di SEPPA tin, actualmente, Magaly Brito, Secretario General, den entrevista cu Matutino DIARIO a indica cu hopi di nan puntonan ta na nivel bilateral, cu tin cu wordo atendi cu gobierno, como dunador di trabao, pero esaki ta un asunto cu, obviamente, no ta pa wordo discuti den dialogo social.

  “Nos mester por papia cu gobierno riba e asunto di falta di personal, y cu tin un presion enorme riba e sector publico den e diferente departamentonan, servicionan esencial cu no tin suficiente personal y cu tin presion riba e trahadornan; cu ta causa absentismo halto, etc., y cu na final tin consecuencianan y efecto pa cu e servicio cu mester wordo brinda, y asina tambe nos mester papia riba e nivel di costo di bida cu ta afectando e sector publico, y cu ta sigui cu e trahadornan”, Magaly Brito a señala.

   El a agrega cu e empleado publico ta keda atras, y e tin su consecuencia cu ne, pasobra su salario ta keda abao y no ta competitivo cu otro salarionan cu ta wordo paga eyfo, den sector priva. Y kizas esey ta un di e argumentonan hopi pisa cu tin aworaki.

   “Hecho cu e salarionan ta un poco abao, y e no ta atrae hopi di nos hobennan pa bin traha den e sector publico, y tin gran escepticismo pasobra tin hopi politizacion den e aparato, y esey ta haci cu e hendenan no ta expresa, nan laga cosnan bay, y tin aspectonan ta keda estanca na e momentonan aki”, segun Magaly Brito.

   Reorganizacion di Departamentonan, Brito ta sigui bisa, cu por ta positivo pa e trahadornan, ta keda tarda masha hopi mes, y esaki no ta motiva nan pa sigui den e aparato publico.

   “Y si antes, un di e factornan cu tabata atrae e trahadornan eyfo pa bin traha den gobierno, cu tabata un areglo di pensioen cu tabata basta atractivo, e ultimo añanan e edad pa baha cu pensioen ta na 65 aña ta un di e problemanan, entre otro. Eyfo tin dunadornan di trabao cu a cuminza avanza den loke ta pensioen general, pero cu ta duna hopi mas porcentahe y cu ta haci cu ta mas atractivo tambe”, Magaly Brito, Secretario General di SEPPA a remarca.