Shardea Arias- Croes a haya reconocimento na e di 16 torneo internacional di baseball JDM na Punta Cana

ORANJESTAD (AAN): Durante e Torneo Internacional di Baseball JDM, lider deportivo Arubiano,

Shardea Arias Croes a ricibi un reconocemento special pa su compromiso continuo cu desaroyo di beisbol hubenil y formacion di hoben atleta.
E evento internacional a reuni mas cu 100 pelotero hoben di diferente pais, creando un ambiente unda talento, enseñansa y oportunidadnan a bay man den man. Entre e invitadonan especial tabatin ex hungador di MLB, Omar Vázquez, scout profesional José Fortuna, y varios otro scoutnan y expertonan di beisbol cu a bin pa identifica talento y comparti nan experiencia cu e siguiente generacion di peloteronan.

Croes, hunto cu su casa, coach Jesus Arias de la Cruz di Hurricanes Baseball, a dedica hopi aña na guia, forma y motiva hoben atleta, no solamente pa bira mihor pelotero, pero tambe pa desaroya disciplina, respect y bon caracter den y pafo di e tereno.

Durante e ceremonia di reconocemento, Croes a comparti un mensahe inspirador cu e hoben participante:

“Laga bo caracter, disciplina y amor pa beisbol ta e cos cu ta defini bo futuro. Traha duro, tene humildad y nunca stop di soña grandi. E esfuerso cu bo ta pone awe por habri porta pa bo mañan.”

E reconocemento ta refleha e impacto positivo cu Shardea y coach Jesus ta haci, inspirando un generacion nobo pa sigui persigui nan meta cu dedicacion, respet y perseverancia, tanto riba veld como den bida.