Na DCALFA Conference na St. Maarten a trata varios punto importante

ORANJESTAD(AAN): Recientemente DIARIO a entrevista Arthur Giel di Centro di Pesca Hadicurari,

riba su biahe recientemente pa e asina yama Dutch Caribbean Agriculture, Livestock and Fisheries Alliance (DCALFA) Conference na

Sint Maarten y el a splica cu esaki tabata e di dos biahe, despues cu aña pasa el a bay Boneiro pa e DCALFA Conference.

Segun Giel, aña pasa tabata tin menos hende cu a bay na e Conferencia, mientras cu e aña aki tabata tin mas cu dobel e cantidad.

“Loke ta bon ta cu tabata tin personanan presente di islanan cu no ta cay den Reino y nan a trece nan experticio pa duna nan apoyo na e otro islanan”.

Tin cu a papia entre otro di combatimento di malesa di mata, segun Giel kende a indica cu Hadicurari tin tur cos na ordo y cu nan a mustra con nan ta haci nan partinan financiero.

“Tin otro islanan cu a bin nobo y nan no tine, mientras cu Hadicurari ta un di e fundacionnan mas stabil den e islanan Hulandes, esta bon organisa y financieramente bon regla”, segun Giel.

El a sigui bisa cu stichting Hadicurari a haya falta si di representantenan di Gobierno den e bestuur na e conferencia.

Segun Giel awor tin dos miembro di piscador den e delegacion , dos di Santa Rosa y un mas cu a wordo escogi, pues falta 2 pa bira 7.

“Nos ta funcionando bon si pasobra semper tin quorum”, segun Giel, kende a indica cu durante e DCALFA Conference e islanan a papia hunto tambe riba e plannan, kico ya pasando y a pasa riba e leynan di proteccion tambe.

A papia tambe riba aspectonan cu mas ta stroba piscadornan den nan trabao y St. Maarten, Aruba, Corsow y St. Eustatius tur a expresa e kehonan cu nan tin relaciona cu e ley y reglanan.

Segun Giel, Boneiro tin nan reglanan bon stipula pa loke ta por ehempel garamento di lobster y calco.

El a splica cu na Saba si ta wordo permiti pa coi calco y lobster manera nan kier, pues e otro islanan ta puntra dicon ‘nan si por y nos no por’.