Instalacion di un miembro nobo pa Aruba Lions Club

ORANJESTAD (AAN): Recientemente, durante e actividad di instalacion di e directiva nobo di Aruba Lions Club tambe a keda

instala un miembro nobo cu lo forma parti di e famia di lionnan. Esaki a keda den e persona di señora Marian Krozendijk di cual su pareha señor Kenneth Bikker ya tin 15 aña como miembro di Aruba Lions Club.

Lion Marian tin hopi aña ta yudando e club tras di cortina, den forma di un amigo di Lions, “Friends of the Lions” y a gusta locual e club ta bin ta haciendo pa decadanan caba pa e comunidad di Aruba. Lion Marian ta hopi entusiasma y tin ideanan fresco pa trece dilanti den e club pa di e forma aki yuda engrandece e club mas ainda y fortalece e laso entre e club y comunidad.

Directiva, miembronan di Aruba Lions Club y di Leo Club ta yama Lion Marianne Bikker-Krozendijk un bonbini y ta dese’e tur clase di exito.

Aruba Lions Club ta un club di servicio cu pa casi 80 aña caba ta trahando incansablemente pa e comunidad di Aruba y ta bao di auspicio di Lions Club Internacional cu ta consisti di mas cu 46 mil club den mas di 200 pais y ta conta cu mas di 1.4 miyon miembro rond mundo y a cumpli 109 aña di existencia cu ta hacie e organisacion di servicio mas bieu y mas grandi mundialmente.

Programanan cu Aruba Lions Club entre otro tin ta Cama di Hospital y rolstoel, Smile Mobile, Back to school food bags, reparticion di comestibles durante fin di aña y Feria di Salud. Ta termina bisando danki pa e apoyo y ta pidiendo pa pueblo keda pendiente pa actividadnan cu ta na caminda.