Minister Gerlien Croes tin 6 siman pa tuma decision basa riba conseho di LAR

Segun Parlamentario Evenlyn Wever-Croes:

ORANJESTAD (AAN): Den conferencia semanal di Fraccion di MEP, Parlamentario Evenlyn Wever-Croes a trata diferente tema y a duna un resumen di e caso di biahe di trabao di Minister Gerlien Croes pa Corsou den un jet priva.

  Manera ya conoci, dia 26 di mei ultimo, Fraccion di MEP a presenta un caso dilanti bezwaaradviescommissie di LAR na unda a expone nan argumentonan. Conforme cu e procedimiento, e commissie mester prepara un conseho pa Gobierno dentro di un termino di ocho siman.

Parlamentario Wever-Croes a informa cu diabierna, 10 di juli, e bezwaaradviescommissie a comunica cu su conseho ya tabata cla y cu esaki a wordo entrega na Minister Gerlien Croes. Segun e parlamentario, esaki ta nifica cu ta e minister mes, y no LAR, tin e obligacion di entrega un copia di e conseho na Fraccion di MEP. Ademas, e minister mester tuma un decision basa riba e conseho dentro di seis siman, indicando claramente si e ta sigui e recomendacion of no.

   E caso ta relaciona cu e biahe oficial cu Minister Croes a haci pa Corsou abordo di un jet priva. Segun Parlamentario Wever-Croes, ora inicialmente a wordo puntra ken a cubri e gastonan di e vuelo, e minister a declara cu e mes a paga e costo di su propio. Sinembargo, Parlamentario Wever-Croes a subraya, door cu ta trata un biahe di trabao, y door cu tin leynan di integridad y leynan di aviacion, cu ta trece duda si e minister a paga si of no.

   Den varios ocacion, Fraccion di MEP a solicita pa Minister Gerlien Croes duna informacion, entre otro na ken el a paga, ki dia el a paga, y cuanto el a paga. Ademas di esaki, e fraccion a pidi e minister documentonan di e permiso comercial di e avion y e lista di pasaheronan y otro informacionnan relevante.

   “Te dia di awe, e minister no a duna e informacionnan cu a pidi. E minister ta nenga di duna cuenta, pasobra segun e ta e mes a paga pa e biahe dus e no mester duna cuenta”, Parlamentario Wever-Croes a remarca.

   Segun e parlamentario, e posicion aki no ta conforme cu e responsabilidadnan cu ta acompaña e cargo di un minister na nos pais. El a enfatisa cu un minister, ora e ta ehecuta un biahe oficial, mester por duna cuenta di kico e ta haci, pa asina permiti Parlamento ehecuta efectivamente su funcion constitucional di controla Gobierno.

   “Pasobra tin leynan di integridad cu ta prohibi cualkier minister di tuma regalonan di un balor cuantioso manera den caso di un jet priva. Y nos mester por controla si e minister a actua enpugna di e leynan di integridad,” Parlamentario Wever-Croes a enfatisa.