Buscando forma pa Aruba tambe por laga pashentnan cu hopi dolor haya pomp portatil di infuus na cas

Tin di introduci ley adecuado tambe

• Special pa pashentnan den ultimo etapa di bida 

ORANJESTAD (AAN): Tur cos a cuminza ora cu un pashent na Aruba, a haci un deseo y esey a pone plannan cuminza draai y a cuminza trece un avance mucho mas amplio dentro di cuido di salud riba e isla.

   Esaki a start cu un señora local, kende ta den su etapa final di su bida y e no kier a pasa su ultimo dianan mas na Hospital, sino na cas, rondona pa su famia y e cas cu semper el a stima.  Pero ora cu e ta na Hospital, su dolornan insoportabel tabata wordo controla cu un pomp di morfina.  Sinembargo como cu e tratamento aki no ta disponibel na Aruba, toch el a dicidi na bay cas bek, aunke e indicacionnan ta cu lo bay pasa algun tempo prome cu e remedinan contra dolor lo bay ta suficientemente eficaz.

   President Renate Raven di Fundashon Ultimo Deseo Aruba (FUDA) a logra di cumpli cu su deseo y a trece bek pa cas.  E experiencia aki a laga dolorosamente na claridad cu na Aruba tin un buraco importante den cuido paliativo.

   Mientras cu na varios otro pais pa hopi aña caba ta haci uzo di pomp portatil di infuus, na Aruba sinembargo e posibilidad aki ainda no ta existi.

   Loke na comienzo tabata parce un caso isola, a resulta di ta en realidad parti di un problema hopi mas amplio y structural.

   A base di tur esaki, Fundashon FUDA a tuma e iniciativa pa crea un grupo di proyecto multidisciplinario, consistiendo di e.o., specialistanan medico, docternan di cas, boticario, nurse, y demas profesionalnan di salud.  Hunto nan ta trahando pa solucionnan pa haci posibel, di forma responsabel, e tratamento specializa di dolor via di pomp portatil di infuus bira posibel na cas di pashent.

   E problema aki ta existi pa varios aña caba, y no ta consecuencia di djis un solo incidente.  E principal obstaculonan ta sinta den e falta di un base legal adecuado, e financiamento di e sistema di cuido aki, y e desaroyo di experticio den cuido di salud na cas.  Pesey e grupo di proyecto aki no ta djis traha na un solucion practico, sino tambe den legislacion necesario, e normanan di calidad, extra opleiding, y implementacion.

   Ultimo temponan, e grupo di proyecto a tene combersacionnan constructivo cu e.o. Ministro di Salubridad Publico, conseheronan di maneho, directiva di Hospital, esnan di AZV, Inspectie di Salud Publico, directiva di DVG, e Kwaliteitsinstituut Gezondheidszorg, Directie Ouderenzaken, y e president di Comision di Salud y Ouderenzorg di Parlamento.  E urgencia di e tema aki ya ta ampliamente reconoci, y e iniciativa a bin ta hayando atencion na diferente nivel.

   E grupo di proyecto ta expresando nan agradecimento pa e disponibilidad di tur organizacion envolvi pa yuda contribui cu ideanan riba e desaroyo aki.  Ademas nan ta boga pa sigui y bin cu accion rapido.  Cada pashent merece di tin acceso na cuido paliativo adecua na e lugar husto y na e momento corecto.

   E legislacion nobo ta ofrece un oportunidad unico pa haci posibel e tratamento specializa di dolor via pomp portatil di infuus na cas mes.  Di e forma ey, Aruba por dal un paso importante pa un cuido paliativa bon prepara pa futuro, centraliza riba e ser humano, y un cuido di calidad halto.

   Pasobra al fin y al cabo, ta trata aki di algo simpel: Brinda e oportunidad na un ser humano, haya e chens pa, ora cu ta medicamente responsabel, laga nan pasa nan ultimo etapa di bida na e cas of otro lugar unda nan ta sinti nan mes mas comfortabel, den nan circulo familiar, rondonan pa nan sernan keri, sin cu nan tin di sufri un dolor insoportabel.

   E grupo di proyecto no lo stop, y lo sigui keda check cu tur instancia envolvi, pa nan sigui colabora pa haya un solucion.  Nan ta spera cu den futuro cercano, e problema aki lo bay bira algo di pasado.

   Riba e potret por mira president di Fundashon FUDA, esta Renate Raven.