“Ta tempo pa transforma SERLIMAR den motor di reciclahe y economia circular”

Parlamentario Otami Thomasia:

ORANJESTAD (AAN): Parlamentario di AVP, Otami Thomasia, ta considera cu Aruba a yega na un punto decisivo den su desaroyo sostenibel. Segun e parlamentario, despues di e paso importante cu pais a tuma pa reduci e uzo di plastic di un solo uso, ta tempo pa sigui avansa cu un sistema nacional di reciclahe moderno y cu un vision di largo plazo.

Thomasia a recorda cu e prohibicion riba saco di plastic, caha di foam y diferente utensilio desechabel a mustra cu Aruba ta capaz di tuma decisionnan balente ora tin un vision cla pa proteha medio ambiente.

“E decisionnan ey a mustra cu, aunke algun medida no tabata popular na principio, nan a contribui na un Aruba mas limpi y a crea mas consenshi ambiental. Awor nos mester sigui cu e mesun determinacion,” Thomasia a declara.

Segun e parlamentario, un di e pasonan mas importante ta reforma SERLIMAR pa responde na e necesidadnan moderno di maneho di deshecho.

“SERLIMAR no mester limita su funcion solamente na recoge y deposita sushi. E instituto mester evoluciona pa bira un centro nacional di reciclahe, recuperacion di recurso y innovacion den sostenibilidad,” Thomasia a enfatisa.

E ta propone pa e transformacion aki inclui inversion den facilidadnan moderno pa separa material reciclabel, desaroyo di instalacionnan pa compostahe di desperdicio organico, cooperacion cu sector priva y partnernan internacional, y creacion di trabounan berde cu ta fortalece economia circular di Aruba.

Segun Thomasia, sushi no mester wordo mira solamente como un problema. Cu inversion, innovacion y bon maneho, hopi material por haya un di dos bida y crea balor economico, mientras cu Aruba reduci su dependencia riba landfill y proteha su medio ambiente.

“Reciclahe no ta un gasto. Reciclahe ta un inversion den nos economia, den nos medio ambiente y den e calidad di bida di nos pueblo,” e parlamentario a expresa.

Thomasia a conclui cu Aruba no por perde e momentum crea door di e medidanan ambiental cu ya a wordo implementa. E ta haci un yamada pa sigui avansa cu vision, liderazgo y decisionnan estructural cu prepara pais pa e retonan ambiental di futuro.

“E decisionnan cu nos ta tuma awe lo determina e Aruba cu nos muchanan y e siguiente generacionnan lo hereda mañan. Ta tempo pa tuma e siguiente paso.”