Gobierno a djis tuma over ideanan di Asociacion SNBA sin sikiera papia prome

President Errol de Freitas:

• Den prome 6 luna di 2026 tin nada impactante pa San Nicolas
• Nan ta desea reunion urgente cu Ministro di Energia 

ORANJESTAD (AAN) President di San Nicolas Business Association (SNBA), señor Errol de Freitas, despues di algun tempo sin duda declaracion na prensa, a haya momento oportuno pa mustra cu den nan bista, e prome seis lunanan di 2026 casi a mira nada impactante wordo haci door di Gobierno pa San Nicolas.  Pa colmo algun idea cu SNBA a yega di trece dilanti, awor ta djis wordo “copia” door di Gobierno, sin duna sikiera cara.

   De Freitas a bisa cu SNBA no kier ‘bati palo’ riba ningun hende y tampoco Gobierno, pero realidad ta cu nan como organizacion a entrega nan “Vision pa San Nicolas” na Gobierno.  Segun SNBA, esaki ta un ‘Vision’ cu ta completo den tur aspecto, pero awor diripiente nan ta ripara cu algun Ministro a dicidi na copia cierto contexto di e ‘Vision’ aki pa asina haci algun trabao chikito paki-paya.

   “Pero hopi cos bo no ta mira ta pasando na San Nicolas,” ta loke president Errol de Freitas a enfatiza riba dje!

   E asociacion SNBA mes a cuminza encamina un proceso di ‘Plan di Ehecucion’ den ultimo lunanan aki, cu ta delinea con pa ehecuta y haci e vision.

   No tin contacto:  “Nos ta riparando cu Gobierno keto bay no tin e atencion pa San Nicolas, fuera di algun actividad, y tambe verfmento den Bernhardstraat, etc.”  Aki el a subraya: “Pero algo cu por haci un cambio real, no ta echt socediendo.”

   Tampoco esnan di San Nicolas y SNBA no tin e ‘conexion’ mas cu Gobierno, manera den pasado cu tabatin reunion ‘Conseho di Ministro’ na San Nicolas.  De Freitas sinembargo a admiti cu SNBA tin contacto cu algun di e ministernan.

   Tuma idea: President di SNBA a bisa cu e no ta rabia si Gobierno tuma algun proyecto di nan pa haci’e.  “Pero bo tin di sinta papia cu esnan cu a origina e ideanan, cu tampoco no ta pasando,” de Freitas a insisti.

   El a splica cu SNBA tabatin un combersacion cu un oficial di Gobierno.  Nan tin hopi respet pa e oficial aki, y nan tin cierto acuerdonan pa haci realiza un plan pa tene un reunion di Conseho di Minister na San Nicolas.

   Cambia economia: Den e entrevista cu DIARIO, e President di SNBA a elabora riba mas topico di importancia, cu ta aspectonan cu inmediatamente por cambia e economia di San Nicolas.
   Aki el a referi riba e terenonan di e Refineria na San Nicolas.  De Freitas aki ta referi na un poliza di energia, incluyendo tur loke por wordo cambia.  Y a enfatiza cu tin di traha riba nan, como cu mundo no ta para!

   El a bisa cu pais bisiña Venezuela tin 300 biyon bari di crudo disponibel, pero aworaki no tin suficiente man, ni Refineria pa sake y proces’e.  Toch e cantidad di crudo cu ta moviendo ta subiendo.  Nan a bula for di 600.000 bari, bay pa 900.000 bari, y awor ya a pasa 1.400.000 bari pa dia.

   “Merca tin mester di gas y petroleo. Hulanda tin mester di mescos, y aki tin Refineria di nos y na nos hermana Isla. Nos no ta competidor, pueblo tin cu compronde cu e refineria di Aruba y esun di Curacao no ta competi cu otro, ami no ta un Refinery-man, pero nos tin un specialista den nos Hunta di Directiva. Nos ta un complemento pa otro”, e president di SNBA a bisa.

   Pa Aruba, aki ta enfatiza riba e sistema di ‘upgrader’, pues ta tuma e crudo, saca e diluyente (‘nafta’), cu ta wordo manda bek pa Venezuela pa asina nan refinerianan aya por funciona.

   Tereno di refineria: Mientras tanto tempo ta pasando, y temblornan na Venezuela a haci cos mas dificil, y por imagina cu e pais tin otro prioridadnan cu nan tin cu haci, cu cierto cosnan na Venezuela ta tranca, pero tur cos ta pasa pa un motibo. Pasobra nos na Aruba tambe ta tranca, pero sikiera Venezuela si tin un motibo pa ta tranca... pero Aruba no tin motibo pa ta tranca asina.

   “Tur hende ta papia cu SNBA di e envidia cu nan ta bay desmantela e refineria.  Desmantela kico?  Anto ora di caba desmantela, ta pa pone kico?  Kico e idea ta cu e tereno di refineria?  Bo plan ta algo cu San Nicolas por biba cu ne?  Cu pueblo di Aruba por biba cu ne?  Pero e ta bo plan, pasobra e ta bo plan.”

   De Freitas a agrega, cu e Refineria na Aruba tin suficiente tereno pa haci hopi cos.  Si bo kier papia di un Science Park... tin tereno p’e!  Si bo ta papia di un Data Center... tin tereno p’e!  Si kier un Yard Harbor.. tin tereno p’e.

   Ademas e president di SNBA a bisa cu tin dos miyon di meter cuadra riba e tereno cu mester reserva pa actividad di energia y petroleo. Tin e parti maritimo, y tin parti di e tankinan pa warda crudo.  Tin 17 tanki, pero corda e tankinan na e parti mas pariba, unda por evalua nan condicion, corta nan, y instala nan bek na e parti zuid pa asina Aruba por yega na 25 te cu 30 tanki pa warda crudo.  Esey riba su mes ta trece ingreso grandi pa Aruba.

   Aruba tin un Minister di Economia y Finanzas, y un Minister di Energia, y SNBA ta puntrando ta unda e ta?  “Nos tin basta tempo di purba di haya Minister Dowers, kende a mustra su buena fe di lo kier sinta cu nos.  Nos tin Prome Ministro kende a percura nos tin un hende den su oficina cu nos tin contacto direct cu ne, mescos cu Minister di Turismo a haci esey, y igual cu Minister di Salubridad nos tin contacto”, De Freitas a bisa.  “Pero di e Minister di Infrastructura nos no sa nada di dje.”

   SNBA ta insisti cu nan kier tende direct di Ministro di Energia kico ta e plannan.  Nan tin bon contacto cu RdA (Refineria di Aruba), pero kier tende directo di e Ministro encuanto su ideanan, su pensamento, y stop cu mezclamento di cartera di Ministronan ora di reuni cu nan.