SVb lo bay raporta proximamente na Ombudsman e medidanan implementa pa evita ripiticion

A cuminsa tuma e medidanan interno

ORANJESTAD (AAN):  Mediante un comunicado, Banco di Seguro Social (SVb) a indica cu recientemente nan a pasa den un proceso di un prome keho di un cliente na Ombudsman. Durante e proceso aki, Ombudsman y SVb a identifica diferente caminda cu SVb mester a trata e caso diferente. Pa esaki SVb oficialmente a ofrece su disculpa na e cliente.

SVb ta tuma bon nota di e rapport di Ombudsman, principalmente e recomendacionnan. Ya durante e tratamento di e caso SVb a cuminsa tuma e medidanan interno y den comunicacion pa evita ripiticion.

Manera palabra, SVb lo bay raporta proximamente na Ombudsman e medidanan implementa pa evita ripiticion.

SVb su compromiso ta keda di paga su pensioenan na tempo y corecto y pa brinda su clientenan un servicio eficiente y cu empatia. Di e forma aki SVb ta sigui contribui na bienestar di nos adultonan mayor.

Segun rapport di Ombudsman, na 2018, SVb a comete un eror administrativo cu a resulta den un ahuste pa loke ta trata e suma di AOV-uitkering (pensioen di biehes) no a wordo corectamente procesa. Como consecuencia, entre november 2018 y november 2021, e peticionario a ricibi mensualmente mas pensioen di biehes cu e tabata tin derecho riba dje. Ora e eror a wordo descubri, SVb a dicidi di cobra e suma cu reclamante a ricibi di mas. Na momento cu e eror a wordo identifica, e reclamante a ricibi mas cu Afl. 30.000 di mas.

Ombudsman a conclui cu SVb tabata tin legalmente e derecho pa cobra e sumanan cu reclamente a ricibi, sin embargo, e manera cu SVb a cobra e suma di placa tabata den varios aspecto contra normanan di conducta apropia.