Minister Geoffrey Wever:
ORANJESTAD (AAN): Entrante awe 8 di juli 2026, prijs maximo di gasolin, diesel y kerosin lo baha. E reduccion aki no solamente ta resultado di e bahada den prijsnan internacional, sino tambe di e subsidio cu Gabinete AVP-FUTURO a duna pa proteha consumidor y mitiga e impacto directo di e conflicto internacional riba poder di compra na Aruba.
Ora e guera a cuminsa den Medio Oriente y prijsnan internacional di petroleo a subi drasticamente, prijs di gasolin y diesel na Aruba tambe tabata bou presion. Pa evita cu e subida cay completo riba e consumidor, Gabinete AVP-FUTURO a introduci un subsidio temporal, unda a duna esaki pa tres luna. E intervencion aki a permiti Gobierno absorbe parti di e aumento y mantene prijsnan na pomp mas abou cu nan nivel real si gobierno no a interveni.
Awo cu prijsnan internacional di gasolin y diesel a baha, Gobierno a dicidi mantene 50% di e subsidio. Esaki ta permiti cu e consumidor por beneficia directamente di e reduccion di prijs, mientras cu Gobierno ta sigui aplica un maneho financiero prudente y balansa.
Conforme e decision, prijs di gasolin Unleaded Premium lo baha cu 10,7 cent pa liter, di 276,5 cent pa 265,8 cent pa liter. Prijs di Gasolie U.L.S. lo baha un poco cu 0,4 cent pa 256,6 cent pa liter. Tambe prijs di Kerosin lo registra un reduccion significativo di 34,8 cent pa liter.
E ahustenan aki ta basa riba e promedio di e cotisacionnan internacional (US Gulf Coast Postings) durante luna di juni y ta confirma cu Gobierno ta sigui monitor continuamente e desaroyonan den mercado mundial pa tuma decisionnan cu ta den interes di ciudadanonan di Aruba.
Na mes momento, e espacio crea door di e caida di e prijsnan internacional ta permiti un ahuste den e accijns riba gasolin y diesel sin pone presion adicional riba consumidor. Asina Gobierno ta fortalece ingreso publico mientras cu ciudadanonan ta sigui beneficia di prijsnan mas faborabel na pomp.
Minister di Finansa, Asunto Economico y Sector Primario Geoffrey Wever a indica cu e decision ta demostra e importancia di un bon maneho financiero basa riba datonan obhetivo.
"Nos responsabilidad ta pa administra finansas publico cu prudencia. Ora mercado internacional ofrece espacio, nos mester haci uso responsabel di e momento pa proteha poder di compra di nos comunidad y na mes momento sigui fortalece e base financiero di Aruba. Esaki no ta resultado di decisionnan improvisa, sino di un maneho responsabel, consistente y planifica," Minister Wever a comenta.
Minister Wever a enfatisa cu un gobierno responsabel no solamente ta reacciona riba cambionan den mercado, sino tambe ta crea un balans entre interes di econsumidor y sostenibilidad financiero di Pais.
"Cada decision financiero mester contribui na un Aruba mas fuerte. Door di sigui maneha nos finansas cu disciplina y basa riba realidad economico, nos ta crea espacio pa sigui inverti den prioridadnan nacional sin pone peso innecesario riba pueblo. Esaki ta e tipo di gobernacion cu Aruba mester," Minister Geoffrey Wever a subraya.
Ministerio di Finansa, Asunto Economico y Sector Primario lo sigui evalua mensualmente e desaroyonan den mercado internacional di petroleo pa sigura cu e prijsnan local ta refleha e realidad di mercado. Gabinete AVP-FUTURO ta mantene su compromiso pa proteha consumidor, sostene poder di compra y tuma decisionnan responsabel cu ta contribui na stabilidad economico di Aruba.
