Presencia fuerte di sector comercial y turistico na evento di “Santander ta yega Aruba”

ORANJESTAD (AAN): E evento exclusivo di networking "Santander ta yega Aruba", organiza e siman aki,

a bira un gran exito y a logra pone e departamento Colombiano di Santander den e spotlight di e sector turistico y comercial di Aruba. E actividad a conta cu un asistencia amplio di agencia distribuidor, agentenan di biahe, companianan di seguro, tiena, otro representantenan di sector privado y miembro di prensa local, demostrando e gran interes cu tin pa e destino nobo aki.

E evento organiza pa Gobierno di Santander, Secretaria di Cultura y Turismo di Santander, ProColombia y Camara di Comercio di Bucaramanga, cu e meta di fortalece e lasonan comercial y turistico entre Aruba y Santander.

Durante e anochi, invitadonan a conoce di cerca e diverso oportunidadnan cu Santander tin pa ofrece, incluyendo turismo di aventura, naturaleza, gastronomia, bienestar, cultura, turismo medico y oportunidadnan comercial y di inversion. Tambe a pone enfasis riba e miho conexion aereo, cu ta haci Santander e destino mas cercano di Colombia pa Aruba, cu un tempo di vuelo di aproximadamente un ora, mas cortico cu cualkier otro ciudad principal den Colombia.

Organisadornan a expresa nan satisfaccion cu e interes y entusiasmo demonstra durante e evento. "Nos ta sumamente contento cu e respuesta positivo cu nos a ricibi for di e mercado Arubiano. E asistencia y e interes sincero di e diferente sectornan ta confirma cu tin un gran potencial pa crea relacionnan comercial, turistico y economico entre Aruba y Santander. Nos ta spera cu e prome paso aki lo habri porta pa hopi colaboracionnan fructifero y oportunidadnan nobo pa tur dos destinacion."

Ademas di turismo, e encuentro a brinda espacio pa dialogo tocante oportunidadnan den comercio, seguro, salud, enseñansa, retail y inversion, fortaleciendo e deseo comparti pa sigui amplia e cooperacion entre Aruba y Santander.

Organisadornan ta mira cu confianza pa futuro y ta spera cu e relacionnan establece durante e evento lo resulta den proyectonan concreto, mas intercambio comercial y un crecimento mutuo cu lo beneficia tanto Aruba como Santander.